Ua faalauiloa aloaia le tatala o le tausinioga e saili ai se tausala o Samoa mo lenei tausaga auā le alo atu ai i le Teuila o lenei tausaga.
O se faaaliga ua tele foi sauniuniga e faatino ai lea ua faamautu mai e lua lelei vaiaso o le a faagasolo ai. E tele sauniuniga a le Pulega o tagata tafafao maimoa mai i fafo o le a faatino e amata atu i le faaaliga lenei, ona o Samoa lea foi e talimalo i le faaaliga a Tausala a le Pasefika i lenei tausaga.
Faaalia e le tamaitai ofisa sili o le Pulega, Matatamalii Sonja Hunter o loo iai lava le manatu e toatele tamaitai talavou o Samoa o le a faaulufale o latou suafa i lenei tauvaga ma o se faiga ina ia saga unai ai foi Samoa i le itu tau i fefaatauaiga, le itu tau i le saga faalauiloaina o lo tatou atunuu e le gata i motu tuaoi o le Pasefika ae faapea foi i atunuu mamao.
O le lua vaiaso lea e faagasolo ua faapea ona iai polokalame e aofia ai asiasiga a tamaitai i nofoaga o tagata matutua i Mapuifagalele. O polokalame i le falemai mo le fanau i Motootua, o galuega faalauiloa i afioaga e lautogia le talimalo i tamaitai.
O fesootaiga auā palota a le atunuu i luga o upega tafailagi ma isi mafutaga ua faapea ona faamautu i le taimi nei.
O le vaiaso atoa foi o le a faamasino ai lava tamaitai i vaega eseese o le tauvaga ma le faamoemoe o le taualujga o le a faia i le po mulimuli o lea faaaliga ma o le tausaga lenei o le a faatgautaia ai le Miss Samoa o lenei tausaga. O le Eleele Fou foi o le a faatautaia ai le faaaliga tele poo le tauvaga e saili ai le Miss South Pacific poo le tausala o le Pasefika.
E le o iai se faamatalaga na tuuina mai i se fesootaiga ina ia faamautu ai se tausala o Niu Sila e tauva i lenei tausaga, ona o le tausaga na tea nei e lei iai se sui o Niu Sila mo lenei faaaliga auā o lea na agai sa‘o lava le sui o Niu Sila mo le faaaliga tausala a le Lalolagi.
O lea ua logo atu i Niu Sila ma Ausetalia faapea Hawaii ma Amerika le tauvaga mo ni a latou sui e ui i lea suiga sa iai i Niu Sila i le tausaga na tea nei.
Ma o le faleaiga o le McDonalds Family Restaurant lea ua foai le $105,000 e avea ai ma lagolago muamua o lenei tausinioga tele.
