Amata saili se Tausala o Samoa mo le Tausala o le Lalolagi

O le vaiaso lenei ua amata ai le faasologa o le tausinioga e saili ai le tausala o Samoa o le a fai ma sui o le atunuu i le sailiga o se tausala o le Lalolagi.
O Bali i Indonesia lea e faatautaia ai lea tauvaga tele, ma ua 25 tausaga o lea faatoa toe agai Samoa e tausinio i lenei tauvaga tele.
O le uluai tausaga la o le toe ofi atu o Samoa i lea tausinioga faavaomalo, na ta‘ua ai e le tamaitai ua faatautaia lenei faaaliga, o Teeva Matafai, ua agai lava e tau saili lenei avanoa ona o le manao e toe agai Samoa i le maualuga lea o tausinioga o faaaliga tausala.
Ae talu ai e lē o toe umi se taimi o lea ua e na o le toafā tamaitai ua tauva i lenei tausaga, o tamaitai e toalua mai i le faaaliga tausala o Samoa i Niu Sila ma tamaitai e toalua mai i Ausetalia.
Ta‘ua e Matafai, o loo tatala le avanoa i tamaitai mai i Samoa nei i le lumanai.  O le tausala o Samoa e pei lava ona silafia o loo filifili mai i le tauvaga lea e faatautaia i le vaitaimi o le Teuila ia Setema i tausaga taitasi. O le tausala a Samoa mai i lea tausinioga e tausinio ma isi tausala o motu o le Pasefika mo le pale o le Tausala o le Pasefika.
O le tausaga na tea nei lea na leai ai ni tausala mai i Niu Sila e tausinio ona o se manatu e tatau ona maualuga atu se isi laasaga e agai i ai le tamaitai tausala o Samoa i tulaga nei o tausinioga faavaomalo. O lea la ua foliga mai ua ofi Samoa i le tausinioga.
O tamaitai ua tauva i lenei vaiaso mo le Tausala o Samoa mo le Tausala o le Lalolagi, o Rosa Taateo, o Crystal Tikeri, Penina Maree Paeu ma Barbara Auvaa.
O le Alii Palemia na feiloai ai le tamaitai o loo faatautaia lenei tauvaga i Samoa ma avane ai lana lagolago i lenei taumafaiga. O aiaiga o lenei tauvaga e aofia ai le tatau ona i le va o le 17 i le 24 tausaga le matutua; e tatau ona 5.8 futu agai i luga lona maualuga; o le paee e tatau ona size 10; o le toa poo le mafai ona ofu le ofu taele (swim wear); faatasi ai ma le lelei i taligafesili.
“O loo fua lava le faiga o le tatou tauvaga, i tulafono mai le pulega o le tauvaga o le lalelei a le lalolagi i Egelani,” o se faamatalaga lea a le tamaitai fa’atonu o le tauvaga a Samoa.
Na amata mai lava anapo le agai atu o nei tamaitai i nofoaga ua faamautu ai a latou faatasiga ma feiloai ai i taitai o le atunuu e oo lava i fanau o loo taofia i le falemai o tamaiti i Motootua.
O le Aso Toonai lea o le a faaiu ai lea tausinioga i le faaaliga ma tuufaatasia ai loa togi o tamaitai nei e saili ai se Tausala o Samoa mo le Tausala o le Lalolagi.