I le faataatiaga o le afioaga o Manunu i le Anoamaa e taamilo maota o le nuu ma e ogatotonu i le Malumalu.
O atu mauga ua i tua atu ma se nofoaga ua tafe ai se vaitafe, ua faamautu ai foi ma le nofoaga o a‘oa‘oga a le Ekalesia a Iesu Keriso o le Au Paia o Aso e Gata Ai i Sauniatu, na o ni nai mita i uta atu o le afioaga o Manunu.
Ae o se nofoaga e mautinoa le lē faalavelave ai o se tasi, e lē tele ni taavale e uia ma ua faamautu lelei i atumauga o le Atu Anoamaa. O vaaiga nei ua ta‘ua e Tauti Tusi Tamasese, ua mafua ai lava le manao e pue “Le Tulafale” i le afioaga lea. O le ‘ava o le feiloaiga, na faatautaia e le afioaga, na faamautu ai ma le amataga o galuega mo le isi ono vaiaso.
O se tu ma se aga e faamautu ai le talia e le nuu o lenei galuega tele ma e faigofie foi le talia ona o le mau avanoa faigaluega ua faamanuiaina ai tagata o le afioaga mai i lenei galuega. O le faaiuga o le vaiaso lea na tea nei na faalauiloa ai i Toronto i Kanata le ata puupuu muamua ua tuufaatasia mai i tala ua tusia e le alii o Tauti Tusi Tamasese.
O se alii na a‘oa‘oina i le Malisi ma Sagato Iosefo i Alafua a o lei ofi atu i le UPY ma maua ai loa le avanoa e aoga ai faasikolasipi i le Iunivesite o Waikato ma faasolo ai loa le sailiga o le faailoga o le Masters Degree i le Iunivesite o Victoria i Ueligitone i Niu Sila.
O le faamatalaga a lenei alii, o le mae‘a o le vaavaai o le Komisi o Ata Tifaga a Niu Sila i le Va Tapuia na ioe ai loa e faatupe le pueina o le ata tifaga tele, “Le Tulafale”.
Faaalia e lenei alii, e ui i le fesoasoani lea e 2.4 miliona tala Niu Sila e lē taitai mafai ona faatupe atoa ai le galuega lenei.
O le vaega muamua lea e 6 vaiaso ua faatautaia ai i Samoa ae o le isi vaega tele o le tuufaatasia o lea ata, ua faamoemoe mo Niu Sila. Faaalia e lenei alii o le ata “Le Tulafale” o se galuega na ia tusia mo lana thesis poo lana suesuega mo lana Masters Degree. “O se tala na ou tuufaatasia mai i le ola a‘e ai i Samoa ma o vaaiga ma uiga nei e tāua tele.
O tala e lē o iloa e isi ma o se unai e pei ona vaaia i Niu Sila o le taumafai ina ia faalauiloa atili le leo o le Pasefika, e ala i tala nei ua mafai ona faamatala ma tuufaatasia i ni ata tifaga,” o se faaaliga lea a le afioga Tauti.
“E tāua tele aemaise o le taumafai lea e iloa e atunuu mamao a tatou galuega, ma saga faalauiloa ai foi Samoa”.
“Aisea o le a lē mafai ai ona oo i Hollywood a tatou ata,” ua ata le alii a o faagasolo ai le faatalatalanoaga. “O le tāua o lenei galuega ona e faa-Samoa, ma o a‘u lava na fai i le tamaitai lea e faatinoa le ata tifaga lenei ina ia faa-Samoa auā o a‘u e lē manao e fai se ata ae e iai se itu e ono faigata ai ona talitonu tagata e moni le ata lea,” o se faaaliga lea a Tauti. “O le faa-Samoa e atili ai ona faamaonia le ata mai i Samoa – e mafai lava ona faitau le faaliliuga a o faasolo le ata tifaga”.
O le tausaga fou ua faamoemoe e faalauiloa ai lenei galuega ma na ta‘ua e lenei alii e aumai lava i Samoa le ata e tatala aloaia ai.
Faaalia e lenei alii o loo telē le avanoa mo alii ma tamaitai Samoa e unai ai a latou galuega e pei o lana tusitusiga lenei ua mafai ona faaliliu i se ata tifaga.
“Tele tele a tatou tala e lē o faamatalaina ma e lē o iloa e le lalolagi, ma e pei lava o tala eseese o loo maua mai i isi atumotu o le Pasefika, o le tatou avanoa lenei e faailoa ai o tatou atunuu ma le matagofie, aemaise o tu ma aga ua mafai ai ona ese mai i tatou mai isi atunuu.” O loo faamautu le silia i le to‘a 30 o alii ma tamaitai papalagi mai i Niu Sila o loo galulue i le pueina o lenei ata, i le faletalimalo o le Galusina lea faato‘ā tatala i le tausaga nei i Solosolo.
O loo iai faatasi ma nisi o tagata o lo tatou atunuu ua maua avanoa i le ata lenei.
O le ata atoa o tagata Samoa uma lava o loo iai ma o le tala ua faatatau i le alofa o se tulafale i lona toalua, ma le tele o luitau e taumafai ai e lagona le leo o lona toalua i se siosiomaga e faigata tele ona talia ia taumafaiga.
