Ua amata nei polokalame mo le faaitiitia o le tino puta ma ia maua le soifua maloloina i alii ma tamaitai malu o le Malo.
O le polokalame ua faaigoaina “Police and Bluesky Biggest Loser”.
O lea polokalame e patino tonu i alii ma tamaitai malu o le malo, ina ia faaitiitia le tino puta, aemaise o le soifua maloloina lelei. Na tatala aloaia lea polokalame i le sauniga na faatautaia i le Aso Faraile 2 o Aokuso 2013, i le Nofoaga e Tutu ai taavale a le Matagaluega i Apia.
E toa 55 alii ma tamaitai malu o le Malo, o le a tauva i lea polokalame. O lea polokalame e pei ona faalauiloa i lea aso, o se luitau mo alii ma tamaitai malu o le malo e tetele tino poo le tino puta.
E tolu masina o le a faatino ai lea polokalalme, mo i latou uma ua filifilia e le Matagaluega e tauva, ina ia faatāuaina ai pea le soifua maloloina lelei.
I le saunoaga autū a le Minisita Lagolago a le Matagaluega o Leoleo, Afioga Tialavea Seinafo Hunt, na ia saunoa ai i le tāua o le polokalame o le a faagasolo. “Ia faatāua lou tagata, o oe o le alii ma le tamaitai malu o le Malo.”
Na saunoa le afioga i le Minisita Lagolago e faapea, e leai se mea e faigata pe afai e na o le faatinoga ae leai se loto ma se mafaufau o tuu atoa i ai. “Ia tuu atoa i ai lou malosi, o lou atamai ma lou agavaa i le faatautaiga o le tauvaga, o ina e iloa ai le alii ma le tamaitai malu o le Malo e mataalia, loto toa ma sailiili i mea lelei.”
Na luitauina foi e le Afioga i le Minisita Lagolago i latou uma o le a tauva i lea tauvaga, ina ia tautuana o galuega lelei uma polokalame o loo faatino.
“E tāua lou faamaoni i le faatinoga o le tauvaga, aemaise o soo se polokalame a le Matagaluega e faatino, ina ia siitia atili ai le auaunaga e ofoina atu i le atunuu,” na saunoa i ai le Afioga i le Minisita Lagolago.
Peitai i le otootoga o le polokalame, na saunoa ai le Afioga i le Komesina o le Matagaluega o Leoleo ma Falepuipui, Afioga Lilomaiava Fou Taioalo, o le Police Biggest Loser poo le Leoleo ua sili ona tele ona pauna ua lusi, o se polokalame o loo faatāuaina e le matagaluega mo alii ma tamaitai malu o le malo, ina ia tausi ai le latou soifua maloloina lelei. “O le Matagaluega e tatau ona amata atu ai le tino lelei o tagata, auā e tatau ona lē maua se isi i le tinoputa poo le tagata ua lapoa tele.” Na faalauiloa foi vaega o le tauvaga ina ia usitaia ona aiaiga uma, a o faagasolo ai le tauvaga mo le tolu masina.
O le luitau lea mo alii ma tamaitai malu o le Malo e pei ona saunoa i ai le Afioga i le Komesina, ina ia tausisi i taumafa paleni ma toaaga e faamalositino i aso uma.
“Lea ua amata mea le Matagaluega ina ia faaitiitia le tinoputa, a ia maua se Matagaluega soifua maloloina lelei ma totoa ona tagata, auā le faatinoina o le galuega ua valaauina i ai.”
O alii ma tamaitai malu o le Malo ua filifilia i lea polokalame, na saunoa Lilomaiava e faapea, o i latou ia e fetaui tonu i ai le polokalame.
E lē aofia taimi faigaluega i taimi e koleni ai le sui tauva, se‘i vaganā ua mae‘a lelei tiute a le Matagaluega, ona maua lea o le avanoa e koleni ai.
O le faatautaiga o lea tauvaga o loo agai mai lava Vaega i totonu o le Matagaluega e lagolago le latou sui o loo tauva.