O le faamanatuina o le 52 tausaga o le Malo Tutoatasi o Samoa i Sini nei na tapena ai e le Fono Aoao ma La‘u Samoa mo le taimi muamua se faiga fou e totogi muamua ai (prepaid) pepa o le Siva autu o le Tutoatasi (Ball) e suia ai mai tausaga ua tea o le totogi i le faitotoa lea sa tele le fenumiai ma sasi ai faatulagaina o nofoa ma laulau.
E lē gata i lea o le toe faamamafaina o le lelei o laei (formal) poo laei lelei o le atunuu e masani ai o le faasolo ma aloha faapea puletasi. Na toe malilie foi le komiti faafoe e siitia le tau o pepa mai le $50 i le tausaga talu ai i le $80 sa iai le faamoemoe o le 2014.
Sa faailoa mai e le taitaifono o le komiti faafoe afioga Tauo Siaki Valu Toomata, o le vaiaso a o lei taunuu i le faamoemoe na tapunia ai le faatauina o pepa lea e aofia ai taumafataga e lima ma le ava malosi, vaiinu ma le iputi.
Sa faigofie foi i le komiti faafoe a fono e lua na faatonu taumafa ma vaitaumafa auā le po taupoina pe a faatusa atu i le taumatematega na iai i tausaga ua alu. E fāselau (400) nofoa ma tagata na fuafuaina aepeitai na faatoai atu le 408 tagata ma faaopoopo ai loa ma le valu auā ua faigofie ona faafoe le toatele ua uma na totogi pepa.
O valaaulia masani na malele ai le Konesula Tofa Manogiamanu Fonoti Etuale Ioane i lana lauga autu i le mae‘a o le tatalo amata ma le faamalosi na saunia e le faufautua a le Fono Aoao ia Rev Iakopo Leleimalefaga.
O nai nisi o valaaulia faapitoa e aofia ai pulenuu ma sui o palemene e pei o le afioga Laurie Ferguson ma le pulenuu o Liverpool ia Ned Mannoun. Na avea le sologa lelei o le faapolokalameina o le afiafi ma auala na leai ai se gase i le faasoaina o nofoa ma laulau o le valaaulia ae tele se taimi na fiafia ai le mamalu o le atunuu i le faafiafiaga a le faaili o le EXODUS aemaise le alii pese iloga ia Toala Eteru.
Na ta‘ape foi le fuamanusina e aunoa ma se pisa auā na matagofie le po i tulaga uma na tapena malosi mai i le ono masina ua tuanai.
