Ua faalēlelei le tatalaina o taaloga o le taamilosaga lakapi a le Iuni a Apia i Sisifo o lenei tausaga ina ua afaina se alii laufali na faatautaia se tasi o taaloga i nai vaiaso e lei mamao atu.
O se tasi o alii taalo o le au a Vaiusu na faaoolima i le laufali ma ua faasala nei e le iuni a Apia i Sisifo, e le toe mafai ona taaalo i le olaga atoa ae mafai ona toe iloilo lona faasalaga pe a tuanai le lima tausaga. O se tasi lenei o faaletonu o loo taumafai pea i latou o taulamua ma lotolotoi i le atinaeina o le lakapi ia aua nei aliali mai, ona e le o se tulaga lelei i le vaavaai mai a isi atunuu i fafo ua maualuga le latou silasila i le lakapi i Samoa.
O le aafia o lea laufali ua le gata ina faasala ai le na faia le gaioiga, ae ua faasala ai foi ma le kalapu lakapi a Vaiusu e le mafai ona toe auai i le taamilosaga mo le isi lua vaiaso, e amata i le vaiaso fou pe a toe faaauau taaloga a le iuni a Apia i Sisifo i le Aso Toonai 14 o Aperila 2012.
O loo faamamalu le iuni i le vaiaso o le aso Maliu e leai ni ana taaloga e pei ona faaalia e se molimau faatuatuaina, ma o se faaiuga na fulisia i ai sui usufono mai kalapu taitasi i le fono masani sa faia i le afiafi o le Aso Gafua 2 o Aperila 2012 i le fale kalapu a le Malisi i Lotopa.
O le fono lea na faaoo ai le faatoesega a le sui o le kalapu a Vaiusu i le laulau a fono a le iuni, e tusa ai ma le faaoolima na faia e se tasi o le kalapu na afaina ai le laufali. Sa tatalo ai foi le sui usufono i se isi faamama avega mo le faasalaga tupe e tasi le afe tala.
Sa faigata i nisi o sui usufono ona talia le talosaga ona o le faaiuga ua faia ua mausali ma sa mamafa foi manatu sa folasia i ai ae sa mafuli e faasala i le tasi le afe tala.
Peitai o le tatalo a le kalapu mo se faamama avega na lagona ai nisi o finagalo faaalia i le femoumouai o faaiuga pe afai e toe sui ona iloa ai lea o le le mautu o ni faaiuga e faia i ni faaletonu e aliali mai ma aafia ai le tulaga tauleleia o le iuni.
E ui sa iai lagona sa faasala ese i le tuualalo a le kalapu a Vaiusu mo se isi iloiloga o le faaiuga ua maea ona faia, ae sa toe suia le iuga muamua i le faaitiitia o le sala tupe i le $500 tala ma aiaiga e tatau ona totogi mai i totonu o le lua vaiaso.
Afai e le ausia le taimi faatulagaina ua tuu atu e totogi ai le sala o le a faaauau pea ona le toe auai le kalapu a Vaiusu i taaloga o le taamilosaga seia vagana ua totogi atoa le faasalaga.
O le kalapu lakapi a Vaitele sa faasala foi e le iuni i le tausaga ua mavae ina ua aafia nisi o tama o lea kalapu i se vevesi faapea nisi o le au tapuai a lea kalapu.
Sa ave foi i ai le faasalaga tupe ma o le tausaga nei na faatoa totogi atu ai le $250 o lea faasalaga tuua. Sa agiga i le fono a le iuni i le vaiaso nei le molia e leoleo o nisi o alii lakapi pe toalua o le kalapu a Vaiusu o loo tuuaia lava i le faaoolima i le laufali.
