Ua amata foi asiasiga a tamaitai e toaono ua avea nei ma sui o le atunuu i le sailiga o se Tausala o Samoa i lenei tausaga. O le tamaitai o Olevia Ioane lea o loo pale i lenei tulaga taualoa o le atunuu ae o le toaono ua faapea ona tausinio nei i le pale o le tausala o Samoa o lea ua agai nei e amata sauniuniga mo le tausinioga, o le a faapea ona taualuga ai le Faaaliga o le Teuila i lenei tausaga.
Ua ese lenei tausaga, ua leai ni sui o tagatānuu o Samoa i Niu Sila ma Ausetalia. Ua leai se faaaliga a le Faaaliga o Tausala a Ausetalia i lenei tausaga ma ua faapea ona lē o toe aofia ai Niu Sila i le faaaliga faaletausaga ua faia i Samoa nei ona o le manaoga e ese lava le tausala Samoa o Niu Sila, ese le tausala Samoa o Samoa nei.
Ae e toalua tamaitai, ua malaga mai le isi mai Ausetalia ma le isi mai i Niu Sila ma ua saili lava a laua lagolago i Samoa mo lenei tausinioga.
O tamaitai talavou nei o le a tausinio mo le pale o le Tausala o Samoa mo le 2012-2013:
Janine Nicky Tuivaiti, 20 tausaga mai Niu Sila, e mai Faleasiu, Levi ma Falelatai, o loo aoaoina nei i le iunivesite o Aukilani.
Talosaga Tautai, 23 tausaga mai Sini Ausetalia, e mai Lepa ma Siumu, o loo aoaoina nei i le tomai faatausi soifua.
Helena Darlene Ainuu, 21 tausaga, e mai Apia ma Lepea, o loo galue o se failautusi lagolago i mataupu tau tulafono i le ofisa loia o Ainuu Law Firm.
Le‘emo Aoina Tupu, 21 tausaga, e mai Lepea ma Toamua, o loo aoaoina nei i le iunivesite aoao o Samoa mo lona faailoga o le Bachelor of Commerce ae o loo galue i se galuega faavaitaimi.
Miriama Siolo Fiu Alo‘ese, 22 tausaga, e mai Sili ma Moataa, o loo galue nei o se tamaitai ofisa mo galuega faatausi tusi le accounts officer i le pisinisi nono tupe o le Faamaoni Loans, ma o loo ia umia foi le tusipasi i tomai tau femalagaaiga ma tagata tafafao mai le aoga o le International Travel College and Tourism of NZ.
Rezettakahealani Eric Mulitalo, 22 tausaga, e mai Vaitele-fou, o loo galue nei i le vaega o le pulega i le kamupani gaosi tapaa o le British American Tobacco i Vaitele.
O loo umia foi e lea tamaitai le faailoga o le Bachelor of Arts in Criminology and Development Studies mai le iunivesite o Ueligitone i NZ.
