Amata le Upega o Fesootaiga Ekalesia Katoliko i Mulivai

E magalua le tāua o le Upega o Fesootaiga poo le Upega Tafailagi a le Ekalesia Katoliko a Mulivai lea ua faalauiloa aloaia.

O le itu tāua muamua o le tatala atu o fesootaiga a le Ekalesia Katoliko i lona Matagaluega ma faalauiloa ana galuega o loo faagasolo i le taimi lenei aemaise le galuega tele ua tala ai i lalo le Malumalu tele i Mulivai ma le Ofisa o le Ekalesia le Fetu o le Moana. O le talafaasolopito atoa o lenei malumalu ua iai i le Upega o Faamatalaga lea ua tatala aloaia nei.

O le itu tāua lona lua o lenei faamoemoe e pei ona faalauiloa ai i lenei vaiaso, o le mafai ai lea ona ao fesoasoani tau tupe ua tapa nei mai i soo se tasi auā le faatupega o le Malumalu tele i Mulivai. O loo iai lava le vaega o lenei tuatusi e mafai ai ona tusi ai soo se foai.

Na saunoa le afioga i le Minisita o Faamatalaga ma Fesootaiga Televavave Faaonaponei, le Afioga Tuisugaletaua Aliimalemanu Sofara Aveau, o le tāua o lenei upega o fesootaiga talu ai o le tele o finagalo faaalia i le tuu i lalo o le Malumalu ua lē gata ina avea ma se tasi o nofoaga autū o le Talafaasolopito o le Ekalesia Katoliko i Samoa, i le umi tele ona iai i lenei nofoaga, ae na o le pau lava foi lea o le malumalu ogatotonu o tapuaiga a soo se itu o le Ekalesia i Samoa ma fafo (Cathedral) i Samoa.

Ua avea foi ma mataaga a Samoa ona o lona fausaga ma lona tulaga i le ogatotonu o le taulaga o Apia. Sa faaaogā o se nofoaga na fesoasoani i le Moli o le Ava – e tele vaa tetele na agai mai i le taulaga o Apia na o latou faaaogā le tulai mai o le falelogo o lenei malumalu tele ma agai mai ai i le Uafu i Matautu (APIA).

“Ae a vaavaai i tala mai i fafo aemaise o mafui‘e tetele ua tutupu pea, o le a faamalieina le toatele – e tele lava mafuaaga na fai ai le faaiuga ina ia tala i lalo le malumalu. Tatou te lē mananao e tulai mai puapuaga na vaaia i aai e pei o Kalaiesetete, e pei foi ona vaaia ai le faaleagaina o le Malumalu tele o Canterbury i lea aai”.

O le Faletua o le alii Minisita – le Afioga Sala Seutatia Aveau na tatala aloaia le Upega o Fesootaiga e ala i le faaola o fesootaiga ma amata ai loa fesoasoani i sana foai e $1,000 mo le sailiga seleni auā le toe fausia o le malumalu. E mae‘a le faatasiga puupuu o lea po ua oo le seleni ma le aao mafola o i latou sa iai i lea faatasiga i le $4,000.

Ua 126 tausaga o le Malumalu lea ua tala i lalo. Sa fausia i le namu (le amu lea e susunu) e pei ona iai le tele o fausaga o malumalu na uluai fausia i Samoa. O le faafitauli ona o lea ua faaaogā le sima ma o le fesootaiga a le namu ma le sima o onapo nei e lē lelei ma mafua ai le vave ona taei o le tino o malumalu.

I totonu o le 126 tausaga o le Malumalu o Imakulata i Mulivai, ua molimauina ai le tele o afā fulifao na aafia ai Samoa. Sa faapea foi ona matuā luluina i le mafui‘e tele lea na mafua ai le galuafi poo le galulolo o le lua tausaga talu ai. O se mafuaaga o le saga faamausali o finagalo o le Ekalesia Katoliko ua talafeagai lava le vave ona fai o se faiga ina ne‘i pa‘ū ifo le malumalu a o tumutumu ai le atunuu i tapuaiga.

Ua tatala nei lava le avanoa i soo se tasi e mafai ona foai atu i lenei galuega tele i luga o le tuatusi ua iai nei i le upega o fesootaiga a le Ekalesia Katoliko i Mulivai.

O lenei galuega o le Upega o Fesootaiga na tuufaatasia ma galue ai le Afioga Toleafoa Elon Betham, ma e tusa ma le $7,000 (tala) le tupe na alu ai i lona tuufaatasiga ma le galueaina ina ia mafai ona maua le fesootaiga tau initaneti.

O isi fesoasoani na molimauina i lea mafutaga na auala mai i sui o le Vasega o le 1978 o tamaitai o Sagata Maria.
O se vasega ua tuufaatasia ai tamaitai na a‘e atu i le Kolisi a Sagata Maria i le tausaga e 1978 ma ua tele atina‘e ua o latou faatino mo le faaleleia o le aoga na faapea ona a‘oa‘oina ai i latou. Ua faalautele foi lea fesoasoani a nei tamaitai i isi galuega moomia a le Ekalesia Katoliko e pei ona latou talimalo ai i le tatalaga o lea faamoemoe.

O taumafa ma meainu o le po na faatupe uma e nei tamaitai mai fesoasoani na o latou aoina ma talosagaina mai sui o le vasega aemaise le aiga o faipisinisi o loo fai paaga ma lenei vasega tuai a Sagata Maria.