Amata le taamilosaga a le USO i Samoa

O lea ua amata le taamilosaga a se faalapotopotoga o alii e tietie i uila vilivae auā le faalauiloaina o tulaga matautia o le gasegase o le Kanesa i Samoa.
O se taumafaiga ua faatulagaina le soo atoa ai o le motu o Upolu faapea le motu tele i Salafai i lea tietiega uila, ma o le faamatalaga a le Sosaiete o le Kanesa i Samoa ua fesootai i lenei faalapotopotoga ua saga unai ai ma taumafaiga a le Faalapotopotoga ua galulue i le faaitiitia o le gasegase o le kanesa i Samoa e faamanino i Samoa lenei galuega tele.
Na amata le taamilosaga a nei alo o Samoa atoa ai ma nisi o tagata tietie uila vilivae i Samoa i le aso ananafi i le talafatai o le taulaga ma agai ai loa i le Anoamaa ma le atu Aleipata.
O le aso ua agai mai ai i Aleipata ma faasolo atu ai i Falelatai ma agai ai loa i le motu tele i Salafai. O le a toe taliu mai i le Aso Faraile i Upolu ma faaiu ai le latou taamilosaga o le atunuu. O le upu USO ua faaigoa ai se vasega o alii tietie uila mai i Niu Sila o loo i Samoa i lenei vaiaso, o le Malamalama, Malosiaga ma le Ausia (Understanding, Strengthening, Overcoming).
O nei alii mai i Niu Sila o ni alo o Samoa ua tietie uila vilivae i Niu Sila ina ia faalauiloa ma lagolago i le faaleleia o soifua maloloina o tagatanuu o le Pasefika.
O le alii taitai o lea faalapotopotoga o Chris Te‘o, o se alii na auai atu i se tuuga na ta‘ua o le Tuuga mo le Ola (Relay for Life) ma na tauva tonu lava i le taimi na maliu ai lona tuaa mai i le gasegase o le Kanesa ma o iina na laga ai loa se manatu e tatau ona iai se tuuga faapea e saga faalauiloa ai i tagata Samoa ma isi atumotu o le Pasefika le tāua tele o le malamalama i auga o lenei gasegase, ia malosi le tali atu i lona aveesega poo le togafitiga aemaise o le ausia ai e tagata o le Pasefika o le laasaga tele o le soifua maloloina ma le soifua manuia.
O le fesootaiga o le faamalosi tino ma le soifua maloloina o lea na faaauau ai loa lona fiafia i le tietie uila vilivae ma faamautu ai loa le faalapotopotoga lenei o le USO faatasi ai ma isi alo o le atunuu e fiafia tele i lenei foi taaloga. E tolu lava mafuaaga o le faatinoga o lenei galuega faalauiloa a le USO – muamua ina ia unai tagata o le Pasefika ina ia siaki le fomai i taimi uma; lona lua ia faamausalī i finagalo o tagata o le Pasefika o le soifua maloloina e o lua lava ma le faatautaia o faamalosi tino; ma le lona tolu o le lelei o taumafa ma le fai o siaki i le fomai e umi ai le soifua.
Talu ona faavae le USO i Niu Sila, o lea ua galulue faatasi ma le Sosaiete o le Kanesa i Niu Sila faapea ai le au tietie uila o le Bike NZ, o aulotu ma faalapotopotoga o le soifua maloloina ma isi faalapotopotoga tuma‘oti auā le taumafaiga o galuega faalauiloa mo puipuiga o lenei gasegase matautia.
O lea foi la ua faalautele mai le latou galuega e ala lea i faalauiloa ua oo mai i Samoa i le fesootaiga ma le Sosaiete o le Kanesa i Samoa nei. O le alii Palemia na ia tatalaina aloaia i se sauniga i le Eleele Fou le taamilosaga a lenei faalapotopotoga ma na ia faaalia ai le agaga faafetai i nei alo o Samoa ua malaga mamao mai auā le taumafaiga e tuuitiitia le numera o ē aafia i lenei gasegase matautia o le kanesa.
O se faamalosiau foi a le Taitai o le Atunuu, e toatele lava tagata Samoa e lē o agai e siaki le fomai ma o le tele o taimi e siaki ane le falemai ua tuai, ma ua faafetaia tele le sao o nei fanau a Samoa i le taumafaiga ina ia unai le iloa ma le malamalama o le atunuu i puipuiga ma le tausiga o le soifua maloloina.