I talafaasolopito o le olaga o Nuufolau Joel Seanoa ua oo ai le alii pii e avea ma Siamupini aoao a Amerika i piiga a le WWE e faaigoa o le Smackdown.
O le masina o Mati na tea nei na feagai ai Seanoa, poo Samoa Joe ma le piiga taitoafa – Four Fatal Flaw – na seia ai e Samoa Joe le fusi mai ia R-Truth. E toalua isi na tauva e atoa ai le toafā o alii pii o Andrade ma Rey Mysterio. Sa manumalo ai Samoa Joe i le piiga toafā lea ma avea ai o ia ma Siamupini a Amerika.
O le siamupini muamua a le WWE o le alii pii o Harley Race i le 1975. O Samoa Joe o le siamupini numera 161 lea a le WWE. O isi na umia lea fusi o Rick Flair, e faaono ona ia maua le fusi. O lona uiga e faaono foi ona faia’ina. A’o le tagata e pito sili ona umi lana pulega o le alii o Lex Luger e lata i le lua tausaga o nofo pea ma le Fusi (563 aso). A’o le pulega pito sili ona puupuu o le alii o Stunning Steve Austin e tasi le aso. A’o Samoa Joe ua atoa le masina o lana pulega mai le aso 5 o Mati ua tea.
E matuā amanaia le tulai mai o Samoa Joe i le nofoaiga fou ona o le matautia o lana taalo. I le piiga ma Andrade, Rey Mysterio ma R-Truth i le masina ua tea.
O le piiga lea na muamua faatea Andrade ma R-Truth ae totoe ai na’o Samoa Joe ma Rey Mysterio. O le taumafaiga a Mysterio e faauma Samoa Joe na misi ai lana oso mai le maea maualuga ae palasi ai i totonu o le maea. Na iloa atu e Samoa Joe faiga a Mysterio na fuafua mai ma minoi ese ai a’o oso maualuga mai le alii pii. O le pa’ū ai na’o ia na liliu atu ai loa ma Samoa Joe e faatino le Coquino Clutch le igoa o le loka na titinaina ai Mysterio, na matapogia ai ma Mysterio i le loka a Samoa Joe ma taofia ai e le laufali le piiga.
E lē uma ai le tau lu’ilu’i e Mysterio le Siamupini a Amerika, o le vaiaso nei e toe feiloai ai le toalua lea na’o laua lava i totou o le maea. O le feiloaiga e fai i le taimi o le Wrestlemania 35 i New York. E ta’utino Nuufolau o le a sa’esa’e i tua Mysterio ma le maea, o ana fuafuaga ia mo le la feiloaiga o loo loma nei.
E ui e amanaia e Samoa Joe le alii o Mysterio ae e lē o popole tele i ai. Na iai popolega i le vaiaso na tea nei i lē taunuu le piiga i le vaiaso nei ona o manu’aga na lipotia ua aafia ai Mysterio. Peitai ua toe lipotia mai le toe foi o le alii pii i lona malosi atoa mo le feiloaiga ma Samoa Joe.
