Amata le pisinisi lafupuaa i Tafaigata

Ua amata nei ona tapena ma faamamā se fanua mo se kamupani fou, o le a faatuina ai le latou auaunaga i lea fanua i Tafaigata, e tausi ai se lafu puaa ma saunia ai foi le aano o meaituaolo poo puaa mo le fofoga taumafa o le a faatau atu i faleoloa lava i totonu o le atunuu.
O le kamupani a se alii Saina o Mr Wiki, ae ua maupaolo nei i se tamaitai Samoa, ma ua faaigoa le la kamupani o le WNK Co Ltd.
Faaalia le fiafia o Mr Wiki ina ua mafai ona la maua lenei fanua tele e faatino ai le la pisinisi. E 15 eka le tele o le fanua ua faatulaga nei e Mr Wiki e tausi ai loa i le taimi nei ni meaituaolo se 100, ae lē faatapulaa i na o meaituaolo, auā o le a faia ai foi ni faatoaga o fualaau faisua, ma totō le manioka ma umala e fai ai meaai a puaa.
O le fanua lava lea o le a fausia ai foi ma se fale o le alii pule ma lona aiga, faapea le fale o le a faaaogā mo le gaseseina o aano o meatuaolo mo le faatau atu.
O le tulai mai o nei pisinisi, o le a fesoasoani tele i le fofoga taumafa o le atunuu, aemaise foi le atinae o le tamaoaiga o Samoa.