O le atu Aleipata agai mai i le Anoamaa na amata mai ai le malaga ta’amilo a tusitala o Samoa e faalauiloa a latou auaunaga ma faatosina mai tama ma teine a’oga agai i lenei galuega mo so latou lumana’i.
O se pasi ua uta ai le au faasalalau ma tusitala mo lenei faamoemoe ma e ta’i lima lava minute e talanoa ai le tusitala poo le tagata faasalalau i lenei galuega ma mataupu e tatau ona faamalosia le aoaoina ai o fanau aua le maua mai ai o lenei tomai.
“Ua tele ina faasinosinolima le atunuu ma faapea mai o lenei auaunaga ua faamatalaina o le ‘au faitatala, o le ‘au milomilo tala, o le ‘au faatupu tala, ae o le una’i lea ua faia mo le taimi muamua ua faapea atu ai i tama ma teine a’oga o kolisi eseese o le atunuu, e taua tele lenei galuega, o le vaega lona fa pe a mae’a le tafatolu o pulega faa temokarasi, le Palemene, le Faamasinoga ma le Malo. O le vaega lona fa, o le galuega faa tusitala ma faa faasalalau,” o se faaaliga lea a le Peresetene o le Asosi o Tusitala, i le faalauiloaina o lenei malaga taamilo.
E tolu aso i Upolu, tolu aso i Savaii o lenei faamoemoe ma o le aso o le a faapea ona agai ai lenei faigamalaga o sui sinia o nusipepa, televise me leitio i le Vaimauga ma Faleata faasolo atu ai i le Itu o Aana.
Ua tele tausaga o talanoaina e le asosi a Tusitala se malaga faalauiloa faapenei ae o le toaitiiti lava o i latou e mafai ona tuua galuega ae faatino lenei faamoemoe ma le le lava o se seleni na tuai ai lava ona faatino lenei faamoemoe ma o le lagolago malosi a le Bluesky Samoa lea na ofo atu ai se tinoitupe e $5000 ma meafaigaluega i le tau e $3000 lea la ua mafai ai ona faatino lenei faamoemoe.
O loo malaga faatasi sui nei o nusipepa, leitio faapea ai televise ma sui o le aoga o Tusitala i le Iunivesite Aoao o Samoa ina ia mafai ona talanoa i fanau e iai le faamoemoe e aoaoina ai i lenei mataupu i Lepapaigalagala i le lumana’i.
O le faamoemoe ina ia mafai ona sui le vaavaai a le to’atele i lenei tautua ma ia iai le mana’oga o fanau lalovaoa o le atunuu e aga’i i le lumana’i e sa’iliili ma maua faailoga i le tomai lenei aua le maua ai fo’i o galuega.