Amata le liki o le soka i Samoa

Talu ona maea vevesi na agiga ai foi le igoa o Samoa i potopotoga faavaomalo o le taaloga o le Soka, o lea ua amata lana taamilosaga mo le atunuu atoa i kalapu i totonu o le atunuu.
E 12 kalapu ua mafai ona faataunuuina lenei taamilosaga e pei ona vaaia ai tausinioga na amata i malae taalo o le Joseph Blatter i Tuanaimato.
Faaalia e le sui o le Pulega o le Soka le alii o Stefan. O loo faasala pea Samoa e le Asosi Soka a le Lalolagi le FIFA ona o le le tali atu i manaoga ia na suesue ai le faaaogaina o seleni na tuuina mai e le Asosi Soka faavaomalo aua le faatautaiga o ana polokalame atiae.
O le finauga na faamalagai i le lua tausaga talu ai ona o lenei manaoga o le FIFA na mafua ai feeseeseaiga na faaali ai le le malilie o i latou na faafoeina lenei taaloga i le atunuu i tausaga ua mavae.
O le faasalaga o le soka a Samoa e le mafai ai ona tausinio i tausinioga faavaomalo ma o le tausaga atoa lea faasalaga ae o loo ua toe faamaopoopo uma lava taaloga mai i polokalame mo le fanau seia oo i le tausinioga lenei ua faatautaia i le taimi nei e le Asosi ma le Pulega fou o le Soka o iai nei.
E manino le tele o polokalame na faatino i tausaga ua mavae e pei ona iai le polokalame a fanau aoga sa vaaia ai le tumutumu o Tuanaimato i tausinioga i le atunuu ae na taofia uma lava ina ua tulai mai faigata i totonu o le Asosi.
O se alo o Samoa mai i Niu Sila lea ua nafa nei ma le tiute faapea le tofiga fou o le vaaiga o le taaloga i le atunuu ma ua unai nei tausinioga aua le manaoga e toe ofi atu i faagatama faavaomalo, ua maualuga se tulaga o iai le tausinio a alo o le atunuu i lenei foi taaloga.
O loo tatala lava e le FIFA le fesootaiga a le asosi i Samoa ma le asosi o le soka i le Oceania ina ia maua ai pea aoaoga mo au taaalo aemaise laufali ma faiaoga ae o le faamoemoe ia manino le faatinoga o galuega ma ia faamaumau uma fesoasoani e aumai i le Pulega o le Taaloga i le lalolagi aua le sologa lelei o le faatinoga o lenei taaloga i Samoa.