Amata le galuega a le Loto Taumafai

Ua silia ma le 30 tausaga talu ona faavae le Loto Taumafai i totonu o Samoa. O se faalapotopotoga ua manino le tele o le sao i totonu o le atunuu i le atinae o soifua o fanau e iai manaoga faapitoa e ala i aoaoga aemaise o galuega ua taumafai ai ina ia tali atu i le tele o manaoga faapitoa o le fanau. O se galuega na faavae mai lava o faatino i le kuata eka lea e i Motootua faafesagai ma le falemai tele i Motootua.
O le vaiaso na tea nei na faapea ona amata aloaia ai le galuega o le faleaoga fou a lenei faalapotopootoga o atinae faaleaoaoga a le Loto Taumafai.
O se fanua e lua eka ua faamatuu atu e le Malo i lea Faalapotopotoga auā le faatinoga o se nofoaga tutotonu mo ana atinae. O lenei fanua ua i autafa o le Kolisi o le Faatuatua i Vaitele.
O le sauniga la na faatautaia i le faaiuga o le vaiaso o le suaina lea o le eleele e amata aloaia ai lenei galuega. Faaalia e le Alii Palemia i le molimauina ai o lea sauniga, ua aogā le alu atu soo o le faauluuluga o lea aoga, ua vave ai ona tali mai le Malo. Ta‘ua e le Susuga Tuilaepa Lupesoliai Sailele Malielegaoi, o vaiaso uma ua oo atu ai Letaa Dan Devoe i lona ofisa ma talosaga lava se nofoaga fou mo le Loto Taumafai.
“O le auala lea ua fai e Letaa ua vave ai ona tali mai auā e iai le manatu, a vave ona ave i ai le tali, ua vave foi ona tuu le faalavelave soo mai,” o le tala ata lea a le Taitai o le Malo. Faaalia e le Peresetene o le Loto Taumafai, le afioga Tagaloasa Uili Matafeo, o le mafuaaga lava o le faalavelave soo o le latou faalapotopotoga ona ua toatele le fanau ma ua lē o toe gafatia e le nofoaga lenei e i Motootua ona aoaoina ai le fanau toatele lenei.
E lē gata i lea ua i se tulaga tuai le nofoaga ma ua moomia lava se nofoaga lelei ma telē atu auā le tali atu ai i manaoga faapitoa o le fanau.
O le fesoasoani a le Malo o Saina ua faafetaia e le Alii Palemia i le faaauau ai ona tali mai i atinae o aoaoga a Samoa. E $12 miliona tala le tau atoa o lenei fale e aofia ai se fale fogafalelua atoa ai potu aoga eseese. E lē gata i lea o le a fausia ai ma se falemai laitiiti mo le tali atu ai i manaoga o le fanau.
O le taimi lenei e to‘a 150 le fanau o loo aoaoina i polokalame atiae a le Loto Taumafai ae e silia i le to‘a 300 sui lesitala ma o nisi o loo agai lava i ai faiaoga a le Loto Taumafai auā aoaoga ma faamalositino faapitoa ua faatautaia mo nisi o nei fanau.

Aoaoga o loo faatautaia i le Loto Taumafai Faleaoga tuai o le Loto Taumafai ae ua maua nei le fanua fou e amata ai lana galuega