Ua amata le iloiloga o le tagi a le Faletalimalo o le Millenia ua faia i le leotetele o tapuaiga a le Worship Center.
O le faamasinoga maualuga ua ave i ai lea tagi a le aiga e ana le Faletalimalo, le aiga lea o Ah Him faasaga i le Ekalesia o loo tuaoi tonu i Sogi, ma o molimau amata o lenei iloiloga e aofia ai Tuala Oli Ah Him – o ia lea na taua i luma o le Faamasinoga Maualuga le le fiafia tele o le latou aiga ma le Faletalimalo ona o le leotetele o tapuaiga ua faatautaia e le Ekalesia a le Worship Center. O le faamatalaga a lenei alii, e sili atu ma le tapulaa o le leo e faatulafonoina le leo o loo alu atu i taimi uma o tapuaiga a le Ekalesia ma ua toatele a latou malo ua faitio i le maualuga tele o le leo o viiga ma isi vaega o le tapuaiga a le Ekalesia.
Taua e Tuala Ah Him, ua oo lava i nisi o malo na nonofo ia latou ua o ese ona ua le mafai ona momoe pe malolo foi i le leotetele o faigalotu o loo faatautaia i le faleie lea e tuaoi lelei ma le Faletalimalo a le Millenia.
O le isi molimau na tulai i le uluai aso o iloiloga o le alii o Jeffery Leung Wai, o se alii faigaluega i le Matagaluega o Punaoa faalenatura ma le Siosiomaga i lona lala e nafa ma mataupu faapenei tau fanua ma eleele, aemaise o feteenaiga e pei ona tulai mai i le faletalimalo ma le lotu.
Taua e lenei alii o le Aso Sa na tea nei na ia fuaina ai le maualuga o le leo o loo faatautaia ai tapuaiga a le Ekalesia o le Worship Center, na ia maua ai o viiga o le Atua le vaega o loo maualuga atu ai le leo nai lo le tapulaa faatulagaina o le leo e tatau ona faalogoina i Aso Sa.
O le tulafono ua faamauina ai o le maualuga o le leo e tatau ona oo i ai le maualuga o tapuaiga i lotu o taeao o Aso Sa ma afiafi o Aso Sa, e i le va o le 52 i le 57 le malosi ma o ana faamaumauga o le sauniga i le Aso Sa na tea nei (12 o Iulai) e faapea, o le lauga na oo ai le maualuga o le leo i le 57 le tapulaa faaletulafono, o le patipati a le ekalesia na oo atu le maualuga i le 65, ma viiga o le Atua e ala i pese na oo atu ai le maualuga i le 73. O lona uiga e na o le lauga o loo usitaia le maualuga faatapulaa o le leo e tatau ona lagonaina i lea vaega o le Aso Sa, ae o le pese ma le patipati ua faamauina le maualuga atu i lo le malosi faatapulaaina.
O le isi alii lea na tulai ai mo lana molimau i lenei faamasinoga o le alii o loo vaaia le faaleotele-leo a le Ekalesia, ma o lana molimau na fesiligia ai i le faatautaia o lenei masini ma le le fiafia o tuaoi. O loo faaauau le mataupu lenei i lenei vaiaso.
Ua tele tausaga talu lava ona fausia nei nofoaga o le faletalimalo ma le faleie tele ua faatautaia ai tapuaiga a le Ekalesia lenei o le Worship Center, o lagalaga pea le Faletalimalo o le Millenia i lenei mataupu ona na o latou taua, a sosoo nei la sauniga i lea nofoaga, e matua le maua se malologa a nisi o a latou tagata asiasi mai ma ua aafia ai le faatinoga o le latou foi auaunaga o loo tuuina atu e ala i le faletalimalo, o se nofoaga mo malologa ma se filemu ua saili mai e tagata tafafao mai i Samoa.
Ona pau le tali a le susuga i le Faafeagaiga o le Ekalesia, le Susuga Viliamu Mafo’e ua faalauiloa ina ia faamagalo atu ia i latou ua ave lenei mataupu i le faamasinoga, ma ua faasagasaga atu pea e taofia a latou tapuaiga i le nofoaga ua maua e le Lotu. O fautuaga ua oo ane i itu e lua ina ia vaavaai i se auala e mafai ai ona malilie itu e lua ina ia faaauau le nonofo faatasi i Sogi ae ia amanaia e le isi itu le manaoga o le isi itu. E foliga mai la ua agai le aiga e ana le faletalimalo i Faamasinoga mo se tali o le latou mataupu ae e pei ona taua e le isi faletalimalo tuaoi i le isi itu i gauta, le Faletalimalo a le Elisa – ona pau le auala e tatau ona vaavaai i ai itu e lua, muamua fau ni potu e mafai ona taofiofi ai le sao atu o le leo o tapuaiga i totonu, ma lona lua, ina ia mafai ona iai se isi nofoaga e taofiofi ai i lalo le leo o loo sau mai i le nofoaga o tapuaiga. E tele isi finauga e mafai ona fai i ai ae o le taimi lenei o le leo faatulafonoina lea e foliga mai o loo matele i ai suesuega o le iloiloga.
Le leo e 63-70
Le lauga e 57
Patipati o lima e 65
Pese e oo i le 73 le maualuga
