Amata le Aoga Faataitai Samoa i Melepone

I le tolu vaiaso talu ai na tatala aloaia ma amataina ai se uluai aoga faataitai i le gagana Samoa i le pitonuu o Dandenong i le aai o Melepone.
O lenei manuia ua ula ma asoa e le mamalu ma le paia o Samoa o alala ma papaaao i lea pitonuu, na tuulima ane e le City Council, o se tasi o a latou anavatau faatino mo lenei tausaga.
Na maua se fesootaiga ma le susuga i le peresitene o le Komiti Faafoe o le aoga, le fetalaiga ia Seualuga Pasese Ioelu ma ia saunoa ai, ua faamatuu mai lenei alamanuia, ona o le lagalaga ma le finau o tupu ma tamalii o le atunuu mo manuia mo alo ma fanau.
Na ia saunoa foi o lenei aoga o loo faatupeina e le City Council le faatamoeina, e aofia ai le totogiina o faiaoga, meataalo ma meafaigaluega o loo faaaogā i le potu aoga, totogiina o le potu aoga (rent) ma tulaga uma e manaomia mo faamoemoe faapenei.
E na o le Aso Lulu o vaiaso taitasi o loo faatino ai le aoga, mai le 10 i le 12 i lalo o se tuutuuga e vaavaaia ma maitauina pe tupu ma ola, ona toe feutagai ai lea o le City Council ma le aoga mo gasologa o le lumanai.
O le  taimi nei ua sefulu ma le tolu alo ma fanau ua resitaraina, ua maitauina ai le lagolago a le mamalu o Samoa, ma o se tulaga faagaeetia lea i le komiti ona o le vave ona afisi ma sapai faatitifaitama e lo tatou atunuu lenei manuia sa lilo.
Na saunoa foi le tofa ia Seualuga Pasese, o le tuutuuga ma le Malo, o le tele lava o alo ma fanau e resitala, o le tele foi ia o aso e mafai ona faamatuu mai.
E tuualalo atu ai foi ma se faatalauula ina ia faaauau pea le lagolago atu a lo tatou atunuu o papaaao i Dandenong ma pitonuu tuaoi, i le resitala o fanau mo le aoga, ina ia tupu ma ola ma faaauau ai pea ona faatāua le aoaoina o la tatou gagana Samoa i potu aoga.
E momoli ai foi le faamalo ma le agaga faafetai i nei toa o le atunuu ona o le finagalo saili malo mo alo ma fanau. Tau ina ia faalautele e le Atua o manuia lenei faleie auā le aotauina o tama ma teine Samoa.