O le faaiuga o le vaiaso lea ua amata ai le iloiloga o le Talosaga o le faigapalota na faia e Le Tagaloa Dr Pita Pola Alailima faasaga i le Minisita o Tupe i le taimi nei, le Afioga Faumuina Tiatia Liuga.
O le talosaga mulimuli lea o faigapalota ua faapea ona amata nei ona fofogaina i luma o le Faamasinoga o faigapalota. O le talosaga ua tuuaia ai e Le Tagaloa le afioga i le Minisita i lona faaaogā o se faatagaga mai i le Pulenuu o le afioaga o Gataivai e faamaonia ai lana lesitala mo le tausinioga o le sailiga o se tofi o le Itumalo faaalalafaga o Palauli le Falefa.
O aiaiga o le tulafono o faigapalota, e tatau ona saini e le sui o le malo poo le pulenuu o le afioaga o loo faapea ona matai mai ai le sui tauva, le lesitala auā le faigapalota. O le gaioiga ua tuuaia ai nei Faumuina Tiatia Liuga o le saini o le pulenuu o Gataivai ae o lona suafa matai o Faumuina e mai i le afioaga o Papa Puleia. O loo iai se faamatalaga e faapea, o le taimi tonu lea e lei iai le pulenuu o Papa i le afioaga.
O le pulenuu la o Gataivai, lea e iai le suafa matai Tiatia o le alii Minisita, lea na sainia le faamaoniga o le lesitala a Faumuina Tiatia Liuga. O loo iai foi se tagi o loo tali mai ai le alii minisita faasaga i le Afioga Le Tagaloa ma o tuuaiga o faiga faaalatua ua tuu atu i luma o le iloiloga ua amata nei.
