O fanau mai le vasega 9 i le vasega 11 i kolisi maualuluga a le Malo ma ekalesia i le atunuu o le a maua nei e o latou mātua se faamāmā avega i le itu i pili aoga, ona o lea ua aloaia nei le meaalofa a le Malo o Niu Sila o le a amata i le masina o Iulai, lea o le a totogi ai pili aoga i le fesoasoani tupe e lima miliona tala Niu Sila.
Ua faalauiloa nei e le Pule Sili o le Matagaluega o Aoga Taaloga ma Aganuu, le afioga Matafeo Tanielu Aiafi, le sauni ai o le matagaluega e faatino le tuuina atu o lea fesoasoani mo na o kolisi ma aoga maululuga a le Malo ma ekalesia, ae e lē aofia ai fanau o loo aooga i kolisi tuma‘oti poo private schools.
E lē gata ina totogi pili o fanau i aoga maualuluga i lea fesoasoani ae o le a faasafua foi se vaega e fesoasoani ai i faiaoga e faatau nisi o mea faitino mo le aoaoina o fanau. O le tausaga ua mavae i le atoa ai o le 50 tausaga o le Malo Tutoatasi o Samoa na sainia ai e le Palemia o le atunuu ma le Palemia o Niu Sila le afioga Toosavili John Key lea fesoasoani, o le a fai nei ma toomaga o mātua i le fai ma faaletonu pili o fanau ona o le tau faasoasoa o seleni i nisi o taimi ua lē lelei ai tupe maua.
E ese le foai lea a Niu Sila mai le fesoasoani a Ausetalia ma Niu Sila o loo soofaatasi ai, o le totogiina o pili o fanau i aoga tulagalua uma a le Malo ma aoga tulagalua a ekalesia, ma o se fesoasoani ua savalia nei le tolu tausaga talu ona amatalia ma le faamoemoe e faaauau pea.
E faapena foi le fesoasoani a Niu Sila mo aoga maualuluga o le a amata i le masina muamua o lena tausaga faaletupe poo le Financial Year o le a sosoo ai nei i le masina o Iulai o lenei tausaga.
