Faaliliuina mai i se lomiga faalauiloa a le ofisa o le Malo (Press Secretariat)
O se vasega o sui o le Faalapotopotoga faipisinisi o le Lamana mai i Papua Niu Kini lea na malaga mai i le vaiaso na tea nei auā se isi feiloaiga ma fono ai ma le Palemia o Samoa, le susuga Tuilaepa Lupesoliai Sailele Malielegaoi i le faagaioiga o lenei galuega tele lea ua fuafua e oo atu i le $120 miliona tala le tau aofai.
Faaalia e le alii Palemia i se pepa faalauiloa a le Malo lona fiafia tele i le tulaga ua oo i ai le faagaioiga o lenei galuega.
Ua tele galuega ua faatino e inisinia auā le fausia o lenei faletalimalo tele ma na ta‘ua e le taitai o le Malo, o lea lava ua manino le aufaipisinisi i le itu lenei, o Taumeasina o se motu na fausia e ala lea i le tanu o le ogasami ua tu ai. Ua silia i le 40 tausaga talu ona amata tanu lea nofoaga ma ua avea ai lava ma motu i le ogatotonu o le talafatai o Apia.
O lea foi la ua agai uma suesuega a tagata faigaluega ma inisinia a le Lamana ina ia mautinoa e fausia le faletalimalo ma isi nofoaga moomia i luga o le motu lenei ua silafia foi le malosi o le motu ma auala e umi ona faatū ai nei ituaiga atinae i se motu faapea.
Faaalia e le Alii Palemia, o le Minisita foi lea o le Pulega a Tagata Tafafao mai i fafo, e mautinoa o se fesoasoani tele lenei i le atinae o tagata tafafao ma o le a vaaia le maualuga e oo i ai ituaiga faletalimalo e pei ona fuafua nei e le Lamana Group.
O le a tele galuega e maua ai mo i latou o loo nonofo latalata ane i Taumeasina ma o le a maua ai foi e faifaatoaga se isi fesoasoani i le tupe maua auā o le a faaaogā le tele o taumafa mai i totonu lava o Samoa e lenei atinae tele.
Ta‘ua e Kostas Constantinou, le Taitaifono o le Vaega lenei o pisinisi ua ta‘ua o le Lamana Development Group, ua toe o ni nai vaiaso ona mae‘a loa lea o le faataatiaga o le galuega atoa lenei ma ua faasalalau foi i totonu lava o Samoa ni konekarate e mafai ona faaaogā a latou auaunaga i le faatinoga o nisi o galuega aemaise le fausia o lenei galuega amata atu i le tausaga fou 2013. E tele galuega faainisinia ma faakamuta ua moomia ai nisi mai i Samoa nei latou te faatino.
Ua faafetaia e le alii Taitaifono le lagolago a le Malo ma le Alii Palemia o Samoa i le unaiga o lenei galuega ina ia taunuu. O se lagolago na ta‘ua e Constantinou ua faamautu ai lava le folafolaga a le Malo e fesoasoani i atinae mai i atunuu i fafo e fia faatutū a latou atinae i Samoa nei. E lua tausaga e fausia ai lenei nofoaga e amata atu i le tausaga fou ma le faamoemoe e mae‘a i le tausaga e 2015.
Ta‘ua e le taitaifono o se isi kamupani o loo galulue faatasi ma le Lamana Group i lenei galuega, o le NASFUND – o Mel Togolo, ua faafiafiaina i le agai i luma o le fuafuaga ma le faatinoga o lenei faletalimalo tele, ma o le iai o le faatuatuaga a faalapotopotoga tetele faapenei i fafo i le tulaga o iai Samoa ma lona tamaoaiga ua mafua ai le manatu e agai mai i Samoa auā le faatū ai o a latou atinae.
Faaalia e Togolol, o le lagolago a le NASFUND i le Lamana Group o lea ua faaali i ai, o le a faaauau ma ua tatala mai ai ma le avanoa e vaavaai ai le Lamana Group i nisi foi nofoaga i Samoa nei auā le faalautele mai ai o isi pisinisi a ia faalapotopotoga o atinae tau pisinisi i Papua Niu Kini.
O le galuega o le faletalimalo o Taumeasina o le a aofia ai potu masani o faletalimalo e 100 faaopoopo i ai ma potu faapitoa e 100 foi.
O le a iai nofoaga mo taaloga i le sami, o le a faapea foi ona iai ni nofoaga faapitoa mo fonotaga, nofoaga mo faleaiga ma soo se faafiafiaga.
