Amata galuega fesoasoani a Samoa ma Leoleo mo tupulaga i Melepone

E pei ona sa lipotia i la tatou pepa i nai masina ua tuanai atu le amata iloilo ai e le aufaigaluega paia  a le Atua se talosaga na faaoo ane e le ofisa o malu o le malo i le pitonuu o Sunshine i Melepone, mose fesoasoani mo alo ma fanau a le atunuu ua taasē ma faatupu faalavelave i nofoaga faitele, lea ua faagasolo ai se fuafuaga moni aoaoga (training) faapitoa e aoaoina ai taitai o autalavou ina ia mafai ona galulue faatasi ma leoleo, ae i le pitonuu o Dandenong
Ua mae‘a la latou aoaoga lea ma ua lua nei vaiaso talu ona amata galulue faatasi ma leoleo ma savalia ai nisi o nofoaga faatali train ma taulaga faatau (shoping centre) aemaise o paka tafafo  lea o loo tele ina tutupu ai misa ma feeseeseaiga i le va o tupulaga Samoa ma tupulaga Sudan mai Aferika, o le susuga ia Temese Leilua ma le susuga ia Anthony Sofe o nisi ia o taitai toa o le autalavou a le Ekalesia Aso Fitu ua fai ma sui o Samoa, ua amata galulue faatasi ma sui o autalavou Aferika aemaise o le matagaluega o leoleo, e tau fofo le faafitauli ua sosolo i soo se tulimanu o le aai o Melepone, ma e tauau lava ina maumau ai ola o tupulaga.
Na saunoa Temese ma Anthony, e iai luitau o le galuega ma e lē faigofie, peitai o tulaga uma ia sa aoaoina i le training lea sa faia e leoleo, faatasi ai ma le fesoasoani a le Atua e ala i le lototele ma le poto, na faaalia foi so la finagalo mo nisi taitai toa o autalavou ina ia tuu atu o latou tauau e tau amo faatasi le avega e māmā ai.
O training nei a leoleo o loo faataunuu i Dandenong ma Sunshine ina ia aofia uma ai le atoaga o le aai o Melepone.