Amata fuafuaga o se monaseri a Monike i Tonga

E fā miliona tala se tupe ua moomia e fausia ai se monaseri mo Tamaitai Sa o le ituaiga o Monike o le Carmelites i Tonga, ma o le faalapotopotoga i totonu o le Ekalesia Katoliko ua fesoasoani i atinae o lea ituaiga i Samoa lea ua faalauiloa le amata i le masina fou o taumafaiga e saili ai lea seleni mo lea faamoemoe.
O le taimi lenei e toavalu monike o loo i Tonga ua o latou amata ai galuega o le tala‘iga ma talosaga mo i latou i lea atunuu. O i latou sa galulue i Samoa ma ua faapea ona faatautaia le isi lea vaega o le galuega a le ituaiga o Monike i lea atunuu.
O le monaseri i Tonga o loo i lalo lava o le faamalu a Carmelite Sisters i Samoa nei. O lea foi na agai atu Tamaitai Sa o lea ituaiga i tausaga ua mavae ma faatū ai se monaseri i Uea ma Futuna lea ua tutoatasi ma ua vaaia lava e Monike i lea atunuu e aofia ai Tamaitai Sa mai i Samoa lea nofoaga.
Faaalia e le taitaifono o le faalapotopotoga ua feagai nei ma le sailiga tupe e fausia ai lea monaseri, ua matuā moomia e monike i Tonga se fesoasoani talu ai o loo nonofo faatasi pea i se fale taalaelae tamaitai o le ituaiga.
O le amataga o le masina na lesitala ai le faalapotopotoga lenei mo fesoasoani i Monike ma ua taitaifono ai le Afioga i le Fofoga Fetalai o le Maota le afioga Laaulialemalietoa Leuatea Fosi Schmidt.
O lana faaaliga ua faia lenei galuega ona o le tele o atinae moomia mo Monike peitai e lē o iai se fesoasoani mo i latou ma o le mafuaaga lea o le faatuina o lenei faalapotopotoga.
O le tasi la lenei o a latou talosaga ua unai e lenei faalapotopotoga, o le sailiga lea o se seleni e fausia ai le monaseri a Monike i totonu o Tonga. O tamaitai monike mai i Samoa na malaga atu ma faatū le lala lea i Tonga.
E pei lava ona silafia o Monike poo Tamaitai Sa o le ituaiga o Carmelites e tatau ona nonofo ese ma e puipuia foi lo latou siosiomaga. O le latou matafaioi poo le latou valaauina e ogatotonu i talosaga, ma o le mafuaaga lea o le manaoga ina ia aveese lava se nofoaga mo i latou. Faaalia e le Tamaitai Sa o loo faauluulu i ai le monaseri i Tonga, o le taimi lenei o loo nonofo faatasi lava ma sui o le Ekalesia Katoliko o loo i le nofoaga lea o le latou tala‘iga ma e na o le pupuni lava o loo faaaogā e tuu eseese ai Tamaitai Sa Monike nei ma le lautele o le ekalesia aemaise foi nisi o Tonga e lē o ni Katoliko ae ua agai atu lava e talosagaina tatalo ma i tamaitai monike.
“E toatele tagatānuu o Tonga ua talosagaina le matou fesoasoani ma e eseese uma lava ekalesia lotu e agai atu ai peitai ua mautu le matou va tapuai faatasi ma e toatele lava ua tumutumu atu i le nofoaga o loo matou iai.
“E lē faapea ua matou lē talia lo latou valaauina ma o se vaega lava lea o le matou talitonuga ina ia talia soo se ituaiga soifuaga e tuu mai, ae o le atoaga o le matou galuega o talosaga e moomia ai lava le tuueseese o monike e pei lava ona vaaia ma faatino i Samoa nei,” o se faaaliga lea a le Tamaitai Sa o loo faauluulu i ai le monaseri i Tonga.
O le faaiuga o le vaiaso na toe tuua ai e lenei Tamaitai Sa Samoa mo Tonga ma le faafetai i le faalapotopotoga lenei ua fesoasoani e amata lenei galuega tele mo se monaseri i lea tuaoi o Samoa.
O le masina la o Me e amata ai se leitiofoni mo lenei faamoemoe ma e lua isi sailigatupe ua fuafua mo le tausaga lenei agai atu ai i le tausaga fou. O le talosaga a lea faalapotopotoga mo le atunuu atoa, ina ia pulupululima faatasi e saili lenei tupe tele auā le faamoemoe o se monaseri poo se nofoaga mautu mo tamaitai monike i lea atunuu.