Amata fesootaiga initaneti i aoga maualuluga

O le vaiaso lenei ua faagasolo ai se galuega tele o le a tatala ai le avanoa mo fesootaiga initaneti i totonu o aoga maualuluga i totonu o Samoa.
O se polokalame ua tele tausaga o taumafai e faatino ae o lea ua taunuu i Samoa masini auā le mautinoa e tofu le aoga o Kolisi e 38 i totonu o Samoa ma lenei ituaiga fesootaiga.
Ua leva ona iai potu o computers auā aoaoga e faatatau i nei masini faaonaponei i le tele o aoga maualuluga, peitai o le fesootaiga tau initaneti na tele lava ina gata i ofisa o aoga taitasi e pei ona faaaogāina ai i galuega a le ofisa poo faiaoga foi peitai o lea o le a tatala le fesootaiga lenei i fanau o aoga maualuluga ia.
Ua pasia le tulafono i Samoa auā le puipuiga o le tuufau o ata ma polokalame i fesootaiga nei ona o ata leaga ma isi ituaiga lomiga na felafoai solo i luga o fesootaiga tau initaneti o telefoni aemaise foi luga o computers ua fesootai ma initaneti ma o se tasi lava lea o popolega na laga i taimi ua tuanai i le tatala o avanoa faapea i fanau aoga.
O le fesoasoani lenei, ua faatupe e le Faletupe o Atina‘e a Asia (Asian Development Bank) ma o lea na amata ona faataitai masini ua tufa atu i le Kolisi o Leifiifi faapea le Kolisi a le Ekalesia Faapotopotoga Kerisiano Samoa a Maluafou.
O le Matagaluega o Aoga, o le kamupani computer o le Datec ma le vaega o aoaoga nei o le internet le School Net, o loo galulue uma ma le kamupani telefoni o le Blufesky Sam oa i le faapii ai o polokalame ma masini ua faamatuu mai e lenei fesoasoani mo lenei atina‘e tele.
O nofoaga tutotonu mo aoaoga o le a faaigoa ai le vaega lenei o vasega faapitoa i totonu o Kolisi Maualuluga ma ua mae‘a foi aoaoga mo faiaoga o le a faatautaia aoga a le fanau i lenei nofoaga.
Ua aofia ai masini computers, o le masini lolomi (printer) atoa ai se masini projector e mafai ona faaaogā i taimi o aoga auā le faatetelēina o ata mai le computer mo le lautele o le vasega.
O le unaia o lenei atina‘e ina ia mafai e fanau i Samoa nei ona malamalama i auala ua faatautaia ai le tele o aoaoga i atunuu i fafo ma ia mafai ona fai ai a latou suesuega ma meaaoga o loo moomia le agai i fafo e saili ai.
O le faamalosia foi lea o aoga a le fanau ma ua fesootai ai ma le tele o suiga ua iai mataupu ua aoaoina i lenei vaitaimi, e pei ona iai se faaaliga mai i le Matagaluega o Aoga faatatau i lenei atina‘e.