O taleni uma ma meaalofa ua faa‘oaina ai lo tou soifua ma lo matou ola, e mai Aao o le Atua ia, ina ia viia ai lana afio, ma faafiafiaina ai o tatou tagata.
E oo foi i le taleni o le siva ma le faafiafia, o le finagalo lea o le susuga ia Victor, lea e faauluulu i ai le aufaafiafia o le Tama Tatau.
Na saunoa Victor, e lei leva ni tausaga talu ona malaga mai e aumau i Melepone, ae o lana taleni siva ma le faafiafia ua leva ona auauna ma tautua ai mo Samoa ma le Lalolagi a o aumau i Niu Sila. O ina foi na ia tofo ai i le fiafia saoloto pe a mālie ma faafiafiaina le aumaimoa ma le valaaulia ia latou tautua faatino e
ala i le siva.
Na ia saunoa foi e ui ina faigata le tuua ai o laufanua o Aotearoa ona o le toatele o le paia ma le mamalu o Samoa o nopiai ma sailimalo ai, ma tele foi valaaulia, ae na iai lava lona faatuatuaga e fia amataina ma faaauau lana taleni i Ausetalia.
E lei mamao atu la se taimi talu ona tuufaatasi le ausiva ma le aufaafiafia, lea ua amata ona tino mai i se tulaga lelei mo le agai i luma, ua amata ona silafia e le atunuu lautele la latou ausiva.
O le tele lava o le mamalu e valaau ma faato‘ai atu ni faamoemoe, o le vave foi lea ona soo Melepone ma lausilafia ai si a latou taumafaiga, ma o loo iai le faamoemoe e fia faalautele mo Ausetalia atoa, pe a tusa ai ma le finagalo o le Tapaau oi le lagi, faatasi ai foi ma le lagolagosua a le mamalu o Samoa.
Na saunoa Victor, e latou te faafiafia mo soo se faamoemoe e pei o Aso Soifua, faaipoipoga ma soo se faamoemoe lava e fai ai faafiafiaga ma siva faa-Samoa.
E mafai ona faafesootai Victor i le 0424727261 mo le silafia atoatoa o le atunuu i la latou aufaafiafia, lea ua faaigoaina o
le Tama Tatau.
