O le tele o faaseā i le auaunaga a leoleo i le itu i mataupu e faato‘ai poo ni tagi, ae fiu tagata ma aiga e ana ia mataupu e faatali poo afea e valaau ai i le faamasinoga, ae pe ua molia ai nisi, ua faapea ona amata ai ona faaaogā se faiga faavae fou poo se policy a le matagaluega o leoleo.
O lea faiga faavae ua faamauina ai soo se mataupu i pepa faatumu ona tuu lea e leoleo le kopi autū ua iai uma faamatalaga o se tagi, ae alu le tagata e ana le mataupu ma le isi kopi.
O faamaumauga ia o se mataupu e mafai ona tuliloaina ai pea leoleo pe a oo ina tuai ona faatino se suesuega ma sailia ai foi poo le ā le mafuaaga ua tuai ai.
Na faaalia e le sooupu o le matagaluega, o se tasi lea o faiga faavae sa soalaupule e le komesina ma le pulega i le naunautaiga e saili ni auala talafeagai e foia ai le tele o faitioga o loo lima tusitusi ai le atunuu i le tautua a le matagaluega.
Ua faaalia e nisi o lo tatou atunuu lo latou lagolagoina o lenei suiga fou, ma le faamoemoe ia avea ma fofo i faafitauli ma faaletonu e faasino i lea matagaluega a le Malo.
O loo iai nisi suiga fou o le a faapea ona auauai lo latou faaaogāina ina ia mafai ona fesootai ma suia atoa ai loa le tulaga o loo faafoe ai mataupu poo tagi e faaulu atu.
