Amata faatino fesoasoani a le Sosaiete Tina o le Pasefika i Melepone

O se tasi lenei o anavatau a tina Pasefika e aofia ai Samoa, Toga, Tuvalu, Maoli ma Fiti ua faaigoaina o le The Victorian Polynesian and Pacific Islander Family Association (TVPAPIFA). O le afiafi o le Aso Faraile na se‘i mavae nei aso 6 o Iulai, na faataunuuina ai se tafaoga tele i le Open Range Zoo Werribee i Victoria. O lenei faamanuiaga na faamatuu mai e le Carers Victoria o loo vaavaalua ma lenei sosaiete a Tina Pasefika, e asiasi fua ai i le Zoo e leai se totogi. Sa vaaia le toatele o le mamalu o le atunuu sa autovaa atu mo lea faamoemoe, ae le gata i lea o se avanoa tāua mo fanau e asiasi atu ai a o iai i malologa mai aoga mo le lua vaiaso.

O le vaiaso nei ua toe iai foi le isi faamoemoe mo se movie night mo aiga uma, ma e faia fua uma foi lenei faamoemoe i le po e leai se totogi.

Mai le lua masina talu ona amataina lenei sosaiete, o le faatolu ai lea ona faatinoina le alofa tulai ma manuia e leai ni totogi. Saunoa le tina ia Vai Tuxworth, le Pule Sili o le Carers Victoria, o le auga o aute o lenei faamoemoe o aiga ma fanau, aemaise lava aiga ma tagata mai atumotu o le Pasefika. E utiuti le faasoa i le itu tau seleni, e faigata ai ona maua avanoa faapenei e tafafao ai alo ma fanau, aemaise foi o le faaalu o taimi e fiafia faatasi ai mātua ma fanau.

O le soifuaga i nei vaitau, ua faasolo lava ina faigata, ae viia le Atua i lenei sosaiete a nai tina, ua mafai ai ona maua tafaoga a nai fanau. E momoli ai foi le faamalo ma le faafetai i le tina ia Pei Taulapapa, se tasi o sui Samoa o le sosaiete, i lona amanaiaina o nisi o aiga, aemaise lava o alo ma fanau, lea na matuā faafiafiaina i le tafaoga i le Zoo.

Tatalo ina ia faalauteleina aao mafola o le Sosaiete, ma ia saga sasaa mai pea manuia mo o tatou tagata.