Ua amatalia nei faasalalauga a Samoa i le alaleo FM89.3 i Sini i le taimi Fou o le lua i le aoauli agai atu i le itula e fa o Aso Lua taitasi (Tues 2pm-4pm).
O le vaiaso ua tuanai na tatala aloaia ai Faasalalauga i le Fale Fou a le leitio FM89.3 i Bigge Street lea ua siitia ai mai le 306 Macquarie i totonu lava o Liverpool.
O le masina o Fepuari na amata ai galuega o lenei siitia mai le fale tuai ua atoa le 100 tausaga i le nofoaga fou ua iai nei. Ua iai foi ma masini fou faaneionapo lea ua atoa le masina o koleni ai le aufaasalalau.
Ua faailoa mai foi e le Polokalame Samoa i se pepa o Faamatalaga le agaga faafetai ona o le suia o le nofoaga aua ua talia ai ma se talosaga ua leva ona tuuina atu aua se aso o le vaiaso e faasalalau ai. O taeao o Aso Sa mai le itula e ono i le valu sa amata faia ai latou polokalame talu mai le 2008.
O nisi o aso faapitoa e manatua pea e le Polokalame talu ona faavae mai i Sini, o le Siamupini lea o le Taitoafitu a le Manu Samoa i le 2010 lea na auai atu ai i Adelaide faapea le matatia ina ua suipi le Manu Samoa i le Wallabies i Sini i le tausaga e 2011.
I upufai o Samoa aua le logopuialiiina o le paia o le atunuu i ana tala fou i Sini nei, sa faasalalauina ai le Malaga muamua mai o le Afioga i le Palemia Tuilaepa Sailele Malielegaoi i Sini lea na fetaui tonu ma le Tutoatasi o le 2011.
E le gata i lea o le taimi muamua na suia ai le alatele ma taavale faapea le taimi na tutusa ai aso o Samoa ma atunuu i fafo, na tapa ai e Tala Fou a le TV SBS se manatu o le Polokalame.
O le Afioga a Leaupepe Matautu lea e manatua pea i lana Siamupini i Faipelega i le 1968 ma Pine Auro i taaloga o le Oceania i Papua Niu Kini o loo avea lava ma faatamā o le polokalame.
O le taimi fou lenei i aoauli o Aso Lua o le a sosoo mai ma se polokalame ua loa tausaga o tautua mo tagata Samoa i Sini, le Samoa Laalaa FM99.9 lea e tautai mai ai le fetalaiga Lealaifola Lauvale Su‘a mai le 12 i le aoauli agai atu i le itula e lua.
Na saunoa le Faatonu o le Polokalame FM89.3, o le see mai i le Aso Lua ua lelei tele mo Pisinisi aua le faalauiloaina aemaise Ekalesia, Faalapotopotoga ma afioaga.
O le masina foi o Iuni e amatalia ai fesootaiga ma le TVOne Apia mo le Tutoatasi i Sini nei.
