Tusia: Autagavaia Tipi Autagavaia
Samoa
Na amata faagasolo i le vaiaso na tea nei ona valaau molimau a leoleo e lagolago ai moliaga o matai ma nisi e lē o ni matai o le afioaga o Satapuala, e aofia ai ma le faipule o Aana Alofi Numera 3 o se tasi o tamalii o lea afioaga, le afioga Toesulusulu Cedric Schuster.
O lenei faamasinoga sa tolopo mai i le tausaga ua mavae, ina ua teena moliaga e lē toasefulufitu o tagata o le nuu e aofia ai ma le faipule. E pei ona silafia o le mataupu lenei na mafua ina ua poloka se vaega o le alatele agai i le malaevaalele e matai ma taulelea o le nuu o Satapuala, ona o finauga sa faia ma le Malo i eleele o le a fausia ai le falemai faaitumalo e faafesagai ma le malaevaalele faavaomalo i Faleolo.
O folasaga amata a loia a le itu a leoleo na folasia ai e faapea o le faipule le isi o matai o le nuu na taulamua i le faia o le faaiuga e poloka se vaega o le alatele e pei ona molia Toesulusulu Cedric i moliaga e sefululima e aofia ai moliaga e fitu o le faatupu vevesi, fitu moliaga o le tuuina atu o faamatalaga sese ma le faalavelave i galuega a leoleo ma le moliaga e tasi o le auai i se faapotopotoga o tagata e lē faatagaina i le tulafono.
O le isi toasefulufitu o tagata Satapuala o loo molia i solitulafono o le faalavelave i leoleo, faaoolima, faia o tala tau faamata‘u, faapotopoto i se auala e lē faatagaina i le tulafono, lafoina o tala tau faifai, ma le umia o ni aupega matautia e pei o agaese ma laau malosi. O isi matai o le nuu o loo molia faatasi ma le faipule, o Muagututia Leao Akeripa e 9 moliaga, Vaili Mimita e 25 moliaga, Ga Sakaria e 8 moliaga, ma le faipule e 15.
E toatolu isi matai e taisefulu o latou moliaga ae o isi e tailua moliaga. O loo toe faaauau pea la lenei faamasinoga ma le faamoemoe e lua i le tolu vaiaso e faagasolo ai le fofogaina o molimau.
