Na faatumulia le potu faamasino numera tolu o le Faamasinoga Faaitumalo i le Aso Lulu o le vaiaso talu ai, i pagota e toa 41 na sosola ese mai le falepuipui i le aso 12 o Me ina ua faatoa valaau o latou moliaga faasolitulafono e mafua mai i lea gaioiga.
E tolu moliaga o loo molia ai, e aofia ai le umia o se aupega ua faaalia o se agaese, faia o tala tau faamatau, ma le sosola ese ma le vaaiga a leoleo.
O nisi o loo tetee uma i nei moliaga, ae o nisi o loo ioe. O nisi foi e ioe i isi moliaga ae tetee i le isi, ma o le masina o Oketopa e lau ai faaiuga o i latou ua ioe, ae o Novema e iloilo ai molimau mo moliaga o loo tetee i ai nisi pagota.
Ua lua masina o ta loka le 41 pagota i le pasima talu mai le aso 12 o Me na tulai mai ai le solaaga, lea na malaga ai i le pasi a Tafaigata agai ane i le maota o le Malo e fia momoli a latou faasea i le Malo, ae na faavave atu leoleo ma fana le pau o le pasi ma le taunuu ai lea fuafuaga, ma toe faafoi uma ai i Tafaigata.
E lua pasi na momoli ane ai pagota i le faamasinoga ma sa tofu lava le leoleo ma lana pagota e vaai.
O pasi foi ia na toe faatietie uma ai ma toe ave i le falepuipui ina ua maea ona valaau o latou moliaga.
O le toatele lava o pagota nei na sosola o loo tuli faasalaga i solitulafono o le umia o laau faasaina.
