O se vaiaso pisi lenei i le Faamasinoga Maualuga ona o mataupu ua faaulu atu nei e faasino i nisi o sui tauva ua lesitala mo le faia i ai o filifiliga a nisi o itumalo.
E ta le 12 i le Aso Gafua 15 o Fepuari 2016 (Aso Gafua o le vaiaso nei) ua iva mataupu ua faaulu ai talosaga a nisi o sui tauva, o komiti ma matai o nuu ua fesiligia ai le tulaga agava’a o nisi o sui tauva.
O le mataupu muamua ua valaau i le faamasinoga i le amataga o lenei vaiaso o le talosaga lea a le afioga Fiame Naomi Mataafa sa umia le tofi faipule o le itumalo o Lotofaga, faasaga i le sui tauva le susuga Fiaola Iosua.
E na o le toalua lava sui faatutu o lea itumalo ua mae‘a ona lesitala mo le faigapalota o loo lumanai nei. O le talosaga lenei o loo fesiligia ai le agavaa o Fiaola ona e iai se mataupu tau solitulafono na aafia ai.
Na pau lea o le faamatalaga ua oo mai ae o le a iloa uma le atoaga pe a suesueina le mataupu.
O le Aso Lulu o le vaiaso nei e toe valaau ai ona o loo ave le avanoa i lē o loo faasaga i ai le talosaga e tuuina atu ai sana faamatalaga tusitusia e tali atu ai i le talosaga a le afioga i le Sa‘o Faapito.
O isi mataupu e valu e lei faailoaina mai e le Pule Sili o le Matagaluega o Faamasinoga le atoaga.
O lana saunoaga mai e faatali se‘i valaau uma nei mataupu i le itula e 3pm i le afiafi o le Aso Lua 16 o Fepuari 2016 o le a iloa ai suafa o ē o loo aafia atoa ai ma itumalo. O talosaga uma nei o loo autu i le fesiligia o le agavaa o sui tauva e tusa o aiaiga o le Tulafono o Faigapalota 1963.
E lē gata o le agavaa i le faia o le monotaga i le nuu, agavaa i le faia o le monotaga i totonu o le tolu tausaga, ma le tulaga agavaa i le leai o se solitulafono o lona faasalaga e oo i le fā tausaga i le falepuipui poo se sala tupe e silia i le luaafe tala sa aafia ai.
O loo iai foi talosaga o loo fesiligia ai le agavaa o se sui tauva ona e lei atoa le tolu tausaga e nofomau ai i Samoa.
O aiaiga o le tulafono o faigapalota e tatau i le faamasinoga ona faanatinati le suesueina o mataupu ma faia ni faaiuga a o lei tapunia le taimi e toe faaulu ai i tua suafa o se sui poo ni sui tauva ina ia fai ane le faiagapalota a le atunuu, ua iloa tonu le numera o sui tauva o le a faia i ai le filifiliga a itumalo mo ni o latou tofi faipule i le Palemene.
O se vaiaso pisi tele la lenei i le faamasinoga auā o mataupu uma o le a fofogaina i luma o lana afioga i le Faamasino Sili.
