Ua le toe maua se aveai mai faipule tutu toatasi i se feiloaiga ma tusitala e faaleo ai o latou finagalo i mataupu eseese faasaga i faiga faavae ma pulega a le Malo, talu ona maea ona pasia le tulafono o faigapalota e faasino i le taofia o le femoumouai o faipule.
Ua iai le manatu o nisi atonu pe ona ua faamamalu i le paeaiga o iai nei a le palemene lea teuteuga, ua mafua ai ona le toe faalogoina ni finagalo o ia sui mamalu o le palemene ina nei avea ma avanoa e soloia ai loa o latou tofi.
Peitai i se talanoaga faasamasamanoa ma le faipule o Faleata i Sisifo le tofa Lealailepule Rimoni na ia faaalia ai, e le sa‘o lea manatu.
Fai mai le alii faipule o ia lava ia faapea le tasi o faipule o Safata e le suia le la faaiuga i le avea pea ma sui o le Tautua Samoa Party. I le avanoa na maua i le Minisita o Faamasinoga ma le Ofisa o Faigapalota le tofa Unasa Mesi Galo, na faaalia ai e le minisita e le aafia lava sui faipule tutu toatasi i le teuteuga, seia vagana lava ua lesitala o latou suafa i le latou pati ua maea ona lesitala.
“E leai se mea faapena, o loo mafai lava ona o ma faailoa i le atunuu o latou o sui o lena pati, ae seiloga lava ua lesitala o latou suafa i le pati”, o le finagalo lea o Unasa.
E atagia mai i le finagalo o le minisita, e le o afaina lava le tulaga o sui faipule tutu toatasi o le Tautua Samoa i le auai i galuegafai ma tapenaga a lea pati mo le palota tele o le 2011.
Peitai na faaalia e le faipule o Faleata i Sisifo o lona talitonuga e le mafai ona toe aafia se isi o latou i ni polokalame a le Tautua Samoa, aua o le agaga o le teuteuga, ia loka mau sui faipule i le avea ma sui tutoatasi poo le avea ma sui o se pati faaupufai.
Na faailoa i ai e le sui o le nusipepa le finagalo o le minisita i le lē afaina o latou, ae na soisoi le alii faipule ma ia faaalia e leiloa poo ni togafiti faapolokiki ia maua taitaia ai latou.
O masalosaloga o le au matemate o upufai o Malo, afai o lea ua faamamalu le teuteuga lea i le paeaiga o iai nei a le palemene, o lona uiga e ono faia se palota laititi i le masina o Iuni 2010 pe afai o le a soloia nei se nofoa o faipule tututoatasi.
E faavae lea masaloga ona e uma loa Iuni e le toe mafai ona valaau se palota laititi mai ia Iulai seia oo ina faatape le palemene i le masina o Fepuari o le tausaga fou.
