Ua lagalaga e nisi o mātua aemaise fanau a le Kolisi o Ropati Lui Sitivenisone i Tafaigata ni faaseā ua oo nei i le aoga ona o le malosi o se manogi leaga o loo ua faalogoina i lenei vaiaso i lea aoga. O se manogi ua ta‘ua e i latou o loo i le aoga aemaise o mātua, le faigata ona nofonofo lelei pe a faalogoina auā e taai uma i totonu o le lotoā. O loo iai le masalosaloga o le aoga e sau lea manogi i se falegaosi ava poo le pia i Falelauiniu e lē mamao lava ma le aoga.
O se kamupani o lea e lei aloaia le tatalaga ae na amata ona fausia mai i le amataga o le tausaga ma ua faapea ona foliga mai ua mautu ana tagata faigaluega, o lea foi ua mautu le maota tele ma tane o loo faatutū solo ai i totonu ma fafo o lea fanua.
Faaalia e nisi o le fanau le faigata ona alu o se mafaufau i meaaoga pe a malosi tele mai le manogi ma o se faafitauli ua mautinoa o le a umi se taimi o feagai ma le aoga ona o lea lava ua faamautu i Falelauniu le falegaosi ava lea e pei ona ta‘ua.
Ua iai nisi ua manatu na o le pau lava lea o le nofoaga e ono sau ai lea manogi ona na ta‘ua e nisi e pei lava o le manogi o autafa ma luma o le Vailima pe a oo nei ina palu le pia.
E leiloa poo le molo o le pia lea e sau ai le manogi peitai e lei iai se gaioiga a le aoga o faatino i le taimi lenei ina ia faamautu ai lea tulaga. E lei iai foi se gaioiga ua mafai ona fai i lenei mataupu ina ia iai se auala e foia ai le faafitauli.
Ae e fou le manogi, e pei ona ta‘ua e nisi o loo i lenei nofoaga. O le manogi foi lenei na laga ai le faagaulemalie o nisi o le afioaga o Vaitele i tausaga ua tuanai ona na sau i le fale gaosi ava a le Vailima.
O nisi o mātua na ta‘ua foi le misi alofa i fanau o le a faapea ona sogitia le manogi lenei i aso uma auā o le kamupani gaosi ava fou lenei e i Falelauniu e mautinoa lava o le a umi se taimi e faamautu ai i lenei nofoaga tele.