E tusa ma le to‘a 150 tamaitai ua lesitala o leoleo i le Matagaluega o Leoleo a Samoa ma o le faamanatu ai o le vaiaso ua ave ai le faatāua i tamaitai o le lalolagi, na faia ai se faatasiga e manatua ai le taumafaiga a tamaitai o le atunuu i lenei foi tautua.
O le avea ma leoleo tamaitai i Samoa o se tasi o luitau ua tele tausaga o taumafai mai ai tamaitai o le atunuu. O le tele o tausaga na o alii lava na ave i ai le faamuamua i lenei galuega ona o le itu lea e mamafa lava le vaavaai e lē mafai e tamaitai ona faia galuega faapuipuiga aemaise le agai i tua e feagai ma le mau solitulafono, peitai o le faagasolo mai ai o tausaga ua molimauina le tele o le sao o tamaitai e mafai ona aumai i le unaia o puipuiga ma le tausiga o le filemu.
Sa tele ina agai lava tamaitai leoleo i le faatinoga o galuega faaofisa ma e lē avea lava i osofaiga a leoleo ma o se mafaufauga na ta‘ua e le toatele o tamaitai leoleo o loo telē le avanoa e tatau ona avatu ai ia galuega ia i latou.
O le tulai mai o le alii Komesina o Papalii Lolenese Neru na vaaia ai loa le toe tatala o le avanoa mo le toatele o tamaitai leoleo o iai nei e sue i le suega ulufale a leoleo ma avea ma leoleo. O le toatele foi o tamaitai ua tele ina sili i le tele o suega ulufale ma le au faauu ina ua agai leoleo e aoaoina i le aoga a leoleo lea ua amata e le Matagaluega.
O le taimi lenei e toatasi le tamaitai o loo avea ma Komesina Lagolago, toatasi le tamaitai o loo avea ma Inspector poo le leoleo Asiasi ma le toalima ua avea ma Superintendents (supainitena).
O ni tofiga maualuluga ia ma ua faagasolo mai ai loa i satini sinia, satini ma corporals. Ua tatala foi avanoa e agai ai tamaitai i galuega a Malo Aufaatasi i atunuu mamao aemaise le puipuiga tuufaatasi a le Pasefika le RAMSI i le Atu Solomona.
Ae e oo mai lava i le taimi lenei o loo molimauina lava le tele o le eseesega o le itupa o alii ma tamaitai ma o le faaaliga a le tamaitai Hai Komesina o Ausetalia na valaauina se faatasiga e amanaia ai lenei tautua a tamaitai leoleo o Samoa, e leai se vaega o lenei auaunaga e lē tatau ona ausia e tamaitai ma o le tulaga o iai le maualuga o aoaoga a tamaitai o le atunuu e manino ai le tele o suiga o le Matagaluega i le lumanai.
O lea e tālia le filifiliga o se Komesina o Leoleo ma ua tele foi le unai talosia ae ave e se tamaitai lea tofiga ona o le fia vaaia o se suiga e tulai mai i galuega ma atinae a lea matagaluega.
