O le afioga Tuala Iosefo Ponifasio, ua silafia e le toatele o le atunuu, o se alii loia, o lea foi na agai e tausinio i le faiga palota na se‘i mavae atu nei, peitai e lei manuia ana taumafaiga i lea itu. O loo faaauau ona faatino ana galuega o se loia i totonu o Samoa.
O le faaiuga o le vaiaso na tea nei sa toe faamanatu ai le uluai galuega lava a lenei tamalii, o le galuega lea faafitafita i totonu o Niu Sila. E ofi atu Tuala i le fitafita a Niu Sila e faatoa 18 tausaga o lona soifua. O le tausaga lava lea i le 1983 na avea ai lea tamalii ma tagatānuu o Niu Sila ma o lana faamatalaga o le alu e avea o ia ma fitafita, e lei faia i lea taimi ona o se manaoga e tautua Niu Sila ae o le manaoga e faamalie se miti ua leva ona manao i ai ia avea ma fitafita.
O le ofi atu i totonu o le fitafita a Niu Sila na ia ta‘ua na vave ai lava ona vaoia uiga mimita ma le fia ulavale sa iai ae o le tele o lona taimi i le nofoaga o le fitafita i Waiuru na vave lava ona sui ai lona tagata ma malamalama ai i le tulai mai o se tagata e galue mo le puipuiga o lona atunuu ma le tausiga o le filemu.
Ta‘ua e Tuala, e fai o le tele o le aoaoga na ia iloa mai i Waiuru auā le tausiga o le filemu, ae o se aoaoga tele i le avea ai ma tagata matua ma se tasi e faalagolago i ai sona atunuu. O le tausaga e 2004 na toe agai ai lenei tamalii i le galuega faafitafita ma o le masina o Oketopa o le tausaga lenei na aloaia ai loa lona alu ese mai i lea auaunaga. O lea ua galue lenei tamalii i sona lava ofisa faaloia ma lona faletua ia Sarona ae na ta‘ua e le tamaitai Hai Komesina o Niu Sila i Samoa o Jackie Frizell, e lē mafai ona faagalo e le Malo o Niu Sila i latou na ofo o latou soifua e tautuaina lo latou atunuu e ala i le auaunaga faafitafita, ma o le pine taualoa ua tauaao atu ia Tuala Iosefo Ponifasio, o se pine ua amanaia ai lana auaunaga faafitafita.
O se pine taualoa ua faapea ona ave ia i latou e sili atu i le tolu tausaga o galue faafitafita. Na faapea foi ona iai se tamalii Samoa o loo fesootai ma tupulaga talavou a Samoa i Niu Sila ina ia agai i ia foi auaunaga mo so latou manuia.
Na tautua Tuala i le vaega o le fitafita a Niu Sila e ta‘ua o le Auckland Battalion.
