E lei mae‘a le masina o Novema ae ua valoaia e le NPF le faaputugatupe mo le lumanai manuia o Samoa e oo atu lava i le 5000 le aofai o talosaga mo nonogatupe o le a faia i lea faalapotopotoga. E lua mafuaaga tetele, o pili o tamaiti ua lamalama faai‘u aoaoga ma taulaga poo saogatupe faalelotu.
O le faaiuga lava o le masina o Oketopa agai mai i le masina nei, ua vaaia ai le toatele o le au faisaofaga ua agai atu i le NPF e saili nonogatupe.
E lua ituaiga nonogatupe o loo mafai ona faatautaia i le NPF – muamua o nonogatupe laiti ma le isi e ta‘ua o nonogatupe faaogatotonu, e sili atu le tupe e mafai ona nono mai e le tagata faisaofaga i lea ituaiga fesoasoani.
O nonogatupe laiti e na o le 30% e mafai ona nono mai ae o le (mid-term) poo nonogatupe feoloolo ia e ta‘ua ai e mafai ona sili atu ma le ‘afa o lau saofaga ona e nono mai mo faalavelave ma manaoga o le faisaofaga, le faatonu o auaunaga lautele a le SNPF.
E amata mai ia Oketopa na ta‘ua e Tagaloasa Uili na amata ai lava ona laina le toatele i le ofisa o le NPF i Apia ma lona lala i Vaitele auā le talosagaina o loans, ma na iloa lava o le tele o aitalafu i lea masina o pili o aoga ma le Lotu a Tamaiti.
Faasolo mai loa ia Novema ua faatuputupulaia lava ma o le tele o mafuaaga ua ta‘ua atu o le faauma ai o pili a le fanau aoga aemaise i aoga maualuluga ia e tatau ona totogi pili a o lei mae‘a suega auā e lē maua faaiuga o suega pe a lē totogia pili. O le isi mafuaaga tele o faiga taulaga a le Ekalesia Faapotopotoga Kerisiano Samoa atoa ai ma le Ekalesia Metotisi.
O le masina o Setema, e 5,300 le aofaiga o nonogatupe sa talosagaina e sui faisaofaga a le SNPF lea sa faaalu ai se tinoitupe e silia ma le $2 miliona tala.
“E ui e lei maua le fuainumera o nonogatupe mo le masina o Oketopa ma le masina nei, ae e talitonu o loo toatele tagata o loo talosaga mai pea,” o se saunoaga lea a Tagaloasa.
O loo tatala pea le avanoa mo soo se sui faisaofaga a le faletupe o le SNPF e talosaga ai mo se nonogatupe, ma o lea tulaga e faatino lava pe a tusa ai ma le maualuga o loo iai teugatupe a le sui faisaofaga.
O le masina fou, lea o le a tatala aloaia ai le galuega o le fale fou a le SNPF lea o loo faafesagai ma le Faletupe o le atiina‘e o Samoa-DBS i Savalalo.
Faaalia e Tagaloasa, o le galuega ua mae‘a ae o loo tuu pea le avanoa i le kamupani faufale poo le Ca’bella e faaumauma ai galuega o loo fia faamae‘a.
E lē o mautu mai pe fia ni ofisa o le a faaaogāina lea fale, ae o le taimi nei ua amata tapena i totonu i latou ua resitalaina mo le sueina o a latou meatotino i totonu a o lei tatalaina aloaia.
O le masina o Ianuari o le tausaga na tea nei sa amata ai lea galuega tele ma ua iai le fuafuaga, o le aso 11 o le masina fou o le a tatala aloaia ai loa.
