E ui lava ina fesuisuiai le pa‘ū o le tamaoaiga i le soifuaga aemaise le taugata o tau o oloa, ae o loo mafai pea ona faatinoina le auaunaga e ala i le saunia o le fofoga taumafa e pei ona taumafai i ai le faleaiga o le Pasifika Foods Takeaways i le pitonuu o Hillmorton, ma ua lua nei masina talu ona tatalaina lenei auaunaga fou i totonu lava o Kalaiesetete.
O le tolu ai lenei o ituaiga pisinisi fofoga taumafa o loo faafoeina e tamalii lava o le atunuu i lenei aai e pei foi ona lipotia atu i tusitusiga ua mavae, ma o foliga vaaia ia o le tuputupu pea o le fuainumera o tagata Polenisia o loo manaomia auaunaga faapenei aemaise le toatele o ē autovaa mai i totonu o lenei foi aai o fugalaau matala e ui ina malulu.
O lenei faleaiga o loo faafoeina e le alii pule, Fereti Taiulu Feso (Sapapalii) ma lona faletua o Litia (Satapuala), ma o loo lagolagoina malosi e nai o laua aiga aemaise le alo tamaitai o Stunza lea o loo fesoasoani malosi i nai ona mātua mo le pisinisi faapea le Lincoln Meat Supplies.
Na faaalia e le alii pule o Fereti i le tusitala, e lē o ia o se tagata malosi pe mauoloa, ae ua tupu ane sona lagona mo lenei ituaiga auaunaga ma manatu ai e sili ia ona taumafai e faatino.
O ia foi sa galue muamua i le Cecilia Caterings ae ua ia mautinoa, e sili loa ona faavae sana lava faleaiga ma‘oti. O lona faamoemoe maualuga ia fesoasoani lea i le atina‘eina o lana fanau, aiga aemaise lana ekalesia e pele ia te ia.
I le uluai tatalaina o lana auaunaga, sa toatele le aufaigaluega a le Atua na auai, aemaise le lagolago a alaleo leitio Samoa i totonu o Kalaiesetete, faapena foi ma le mamalu o le atunuu e molimauina le faleaiga fou.
Na asia e le tusitala le Pasifika Foods ma molimauina ai le alualu i luma o tapenaga, e ui ina faatoa tau amata, vaaia le matagofie tapenaina o soo se fofoga taumafa mo le atunuu aemaise tagata Pasefika.
O se nofoaga foi e afe gofie ma toatele tagata Polenisia e alaala ai i lea foi pitonuu. Na faaalia mai e Fereti lona agaga faafetai i le mamalu o le atunuu mo le lagolago malosi, aemaise susuga i alii faifeau auā o soo se faiva alofilima e faia e muamua lava le faamua i le Atua e fesoasoani mai i lona vaivai.
Na ia ta‘ua foi atonu o le a aogā lenei taumafaiga e fesoasoani ai i le faatupeina o le aoga a si ona atalii, Mighty Fereti Taiulu mai le matagaluega Metotisi Addington, 23 tausaga lea ua faamanuiaina lana suega ma ua a‘e atu i le Kolisi Faafaifeau i Piula, ma o le taimi nei o loo i Samoa le faletua o Litia mo le faaulufaleina o si o la alo.
Tau ia ina ia alofagia le auaunaga a le Pasifika Foods, ia malosi ma faaauauina lana tautua i le atunuu, o loo faapea foi ona maua ai ma le tatou Samoa Times i totonu o lenei lava faleaiga ma avatu ai ma faamanuiaga a le tatou nusipepa mo le auaunaga aemaise le atalii ua ulufale atu i le laumua o le Kolisi i Piula.
