E lei toe tuuina e le mamalu o Samoa o loo alaala i Aukilani se avanoa i nisi lava fuafuaga sa tapenaina e le komiti o le Ipu o le lalolagi, auā le faafeiloaia o aulakapi taitasi o loo gasolo mai i Niu Sila, ina ua taunuu lana aulakapi le Manu Samoa i le malaevaalele faavaomalo i Aukilani.
O se vaaiga uigaese sa vaaia i lea aso ina ua lau soli le mamalu o le atunuu e faatali le taunuu o le Manu Samoa. O tamā ma tina matutua, e oo lava i fanau laiti, sa lē mafai ona taofia ona o le agaga o le lotonuu ma le faaeaea i lana aulakapi.
E lei popole foi le toatele i le siisii i luga ma le taugata o le pakaina o taavale, ae sa pei o se mea fua ma ua taugofie mea uma ona o le naunau lava e alaga ma faaali le titi faitama ma le lagolago.
O le toatele e lei mafai ona maua se paka, a o nisi foi sa oo atu i le kilomita le mamao ese mai le malaevaalele, sa paka ai taavale ae savavali agai i le vaega tonu sa tumutumu ai le faataliga vaa.
Sa oo lava foi i sui o le pulega faaitumalo o le aai i Aukilani sa nafa ma le faafeiloaia o ‘au uma, faapea nai a latou foi fuafuaga sa fuafua, sa tau lē mafai ona maua se taimi e faatino ai, ona ua lē mafai ona taofiofi pesega ma le alalaga leotetele agai i ana tamafanau.
Na oo lava foi i le faafeiloai masani a tagata Whenua poo tagata Maori, sa leai se isi na amanaia ma tuuavanoa i ai ona o le fiafia ua tele ma le mitamita fai a’e ina ua vaaitino ma lululima i tama o le Manu.
Sa molimauina e le pulega o le malaevaalele i Aukilani, le maoa’e ma le faatusalia o nisi o atunuu tetele sa taunuuu muamua a latou ‘au, nai lo le vaaiga i le afiafi na taunuu ai le Manu Samoa. O nisi o molimau ma talanoaga sa ta’ua ai, faato’ā iloa lava le manogi o le Ipu o le lalolagi o le 2011, ina ua taunuu le Manu Samoa mai Samoa.
O le afiafi o le Aso Tofi o le vaiaso na tea nei, na taunuu ai le aulakapi a le atunuu, ma faatino ai uiga matautia o le lagolago a le mamalu o Samoa o loo alaala i le aai tele o Aukilani.
O le Aso Toonai na sosoo ai, sa toe faaluaina ai lea lava vaaiga matautia, ina ua toe agai le mamalu o Samoa i le aso na faia ai le feiloaiga aloaia mo lana ‘au.
O le fale o le Pasefika i Manukau sa faamaopoopo ai le mamalu o le atunuu, ma faatino ai le faatali e ala i le ava o le feiloaiga, faapea siva ma le taumafataga sa tapena i ai le komiti faapitoa, Manu Samoa Supporters, ma le mamalu i tupu ma tamalii, o faletua ma tausi ma muliauma eseese o le atunuu, i Niu Sila.
E silia ma le 3000 i latou e mafai ona ofi ma faatulagaina i nofoa o lea fale, peitai sa leai se avanoa ma oo ai ina laulaututu le toatele, ona na matuā leai se ofi i le tumu sa molimauina lea aso faapitoa.
E ta ane le lua i le aoauli ua amata ona tau saili avanoa nisi, ma na oo lava i nofoa sa faalaolao mo malo faaaloalogia, e lei toe taofia le mamalu o le atunuu, ae agai ane ma nonofo ai, ona o le utiuti o nofoa, ae sa anoanoai i latou na auai ane.
Sa sologa manuia lea aso, ona o le taumafai lava foi o le Taitaifono ma le komiti faapitoa ma le toatele sa fesoasoani ane i ai, i le tau faatonutonuina ma le vaaia lelei o le mamalu o le atunuu, ae faapea foi tulafono ma aiaiga o lea nofoaga. Na faato’ā taunuu tama o le ‘au i le ta o le fa i le afiafi ma amata ai i le faafeiloai faapitoa a tagata Wnenua, sosoo ai ma le lotu.
O le afioga i le Sea o le Ekalesia Metotisi i Manukau ma le Sinoti a Niu Sila i Matu, le susuga ia Rev Masunu Utumapu sa taitaia i le sauniga, ma saunoa faalaeiau mai le Afioga a le Atua mo le faamoemoe o tama, aemaise foi le tapuaiga a le atunuu.
Na mae’a le sauniga lotu, ona sosoo ai loa lea ma le ‘ava o le feiloaiga, o se ‘ava faatali auā le afio o le Gafatasi Fuimaono Faleomavaega Tafua, o le faiaogaulu o le ‘au, ma le susuga ia Mathew Vaea o le Taitai malaga, faapea le pulega ma le mamalu i tamataalo o le Manu Samoa.
Na uma loa le ‘ava o le feiloaiga, ona saunoa loa lea o le Konesula o le malo Samoa i Aukilani, le susuga ia Faolotoi Reupena Pogi, o ia sa fai ma sui o le malo, e faafeiloai le mamalu o le ‘au valaaulia, ma tagata nuu eseese sa auai ane.
E lē gata i lea, a o le saunoaga autū foi lea o le aso, saga faaopoopoina ai pea le finagalo autasi o Samoa i Samoa, ma Samoa i Niu Sila, auā lava le alo o ana tamafanau i faalagamaea a le lalolagi mo lenei tausaga.
Na matuā sosoo lelei le mae’a o le ‘ava o le feiloaiga, ae patatu loa ma le isi faafeiloaiga e ala i le pese matautia ma le logologoa i lenei vaitaimi, le vii o le Manu Samoa, sa usuina e le susuga ia Seuli Leifi Umalau mai Safotu i Savaii.
E lei tele lava i se pito le pa’i ma le tau tonu o gaioiga ma taga, atoa ma le pese ma lona fati a le alii pese, ma foliga o tama o le Manu Samoa, ma sa toe vaaia ai le lagolago ma le faataitaiō tetele a le mamalu o le atunuu, ma sii a’e a latou fu’a ma alalaga, Go Manu! Go Manu! Go Manu! O siva Samoa a tama uma o le ‘au sa fofogaina foi ma faataunuuina, ma sa faapea foi ona auai ai ma sui mai Kalaiesetete ma isi vaega o Niu Sila, auā le faalauiloaina ma le faamatuuina mai o a latou seleni sa maua i sailiga tupe sa faia, e fesoasoani ai i le Manu Samoa a o iai i Niu Sila.
E tele foi nisi ekalesia ma aulotu atoa ma tauaiga o tama, sa faato’ā togimaa ma faaopoopo ane nisi tupe mo le faamoemoe lava o le ‘au i le afiafi lava lea. Na faaiu lea aso i se taumafataga tele sa saunia lava ma tapenaina e le Taitaifono o le Manu Samoa Supporters, ia Toalepai Lui Tuatolo, Aiolupotea John Roache, Faumuina F. John Mika, Tagaseuseu Ilaoa, Lui Tusani, atoa ma Samoa uma i Niu Sila ma faaauau ai pea viiga ma faafiafiaga ma tama o le ‘au ma le mamalu o le atunuu sa auai ane i lea aso faapitoa o le Manu Samoa.
