Alofagia mafatiaga aoga maualuga Poutasi Falealili

E le au maua ni fesoasoani e tuusao i ni mafatiaga o ni tagata ae leai se silafia o nisi na saunia sea fesoasoani o tagata ua aafia.
E faapena le lagona o le tamaitai pule o le aoga maualuga a Poutasi Falealili, le faletua o Taefalaula Momoisea, ina ua faateia i le afea e le tamaitai o Sonya Taefu Robertson, o se faiaoga mai le Kolisi maualuga a Tamaki i Aukilani.
Na faamatala ma melotagi le pule o Poutasi Secondary School ina ua ia lagona le loto faafetai aua o le $4,000 tala ua faatau ai tusi mo galuega a faiaoga faapea tusi e faaaoga e fanau, o se meaalofa taua a o lei amata aoga a le fanau lea ua toe a‘e uma i le vaiaso nei.
O le fesoasoani e ala i le seleni ua faatino ai lea laveai na saili e faiaoga Samoa ma fanau o le Kolisi a Tamaki e pei ona faaalia e Sonya. O se finagalo na a‘e i faiaoga o Tamaki College ona o le fia faia o se fesoasoani mo nai fanau aoga sa aafia i le sunami i Samoa, lea na latou filifilia ai Poutasi Secondary School ona sa faaleagaina le faleaoga i le sunami.
Na faasee atu uma faiaoga ma fanau ma faaaauau vasega ma le aoaoina o mataupu i le Kolisi o Palalaua i Siumu i le tuanai o le faalavelave faalenatura seia oo i le faaiuga o le tausaga ua tuanai.
O le taimi nei ua toe foi faiaoga ma fanau aoga e faaaoga se fale le tumau ua fausia e aoaoina ai a latou mataupu, ma faatalitali se aso o le a fausia ai se faleaoga fou. E leai se soifua o se tamaititi o lea aoga maualuga a lo tatou Malo na aafia i le sunami, ae na palasi se tasi o faleaoga ma faaleagaina ai vaega uma sa faaaoga e faiaoga ma fanau.
O le faanaunautaiga o le tamaitai faiaoga o Sonya ia aoga le seleni na latou sailia e toe maua ai se fesoasoani mo faiaoga a Poutasi faapea fanau, aua e le taugofie tusi ua faaleagaina. O le mau foi lea a le tamaitai Pule o le aoga maualuga, ona o nisi o tusi e faaaoga e le maua i le ofisa autu o aoga i Malifa.
O loo faasolo pea galuega a le Malo mo le fausia o laoa ma maota na faaleagaina i le sunami faapea ma le fausia o faleaoga na faatamaia i lea faalavelave faalenatura.