Alofagia le malaga a tina o Leauvaa

Mafutaga tina matagaluega Sagato Mikaele o Leauvaa
Mafutaga tina matagaluega Sagato Mikaele o Leauvaa

E to’a 35 le aumalaga a le Mafutaga tina matagaluega a Sagato Mikaele i Leauvaa o loo malaga tafafao mai i Aukilani e malolo ma asiasi mai i o latou aiga, ina ua mae’a le latou galuega tele sa gapatia ai i le tausaga ua mavae i le tapenaga lea o le maota o le matagaluega aemaise o le malumalu tapuai i totonu o Leauvaa i le faamanatuina lea o le latou selau tausaga a le ekalesia e pei ona iai i le tausaga ua tuanai.

O le galuega tele sa feagai ma tina o le faamatagofieina lea o totonu o le aai atoa i Leauvaa a’o loma ai le faamoemoe o le matagaluega.

O le inailau a tina e au i soo se matata i totonu o aiga nuu ma ekalesia, ae o le pae foi lea ma le auli o loo latou faaleleia ma faamafolafolaina mea uma i totonu o nei vaega taitasi ina ia matagofie ma lelei auā le viiga o le Atua.

Peitai ua mae’a lea galuega tele sa galulue punoua’i ai le mafutaga, ona iai lea o le manatu maualuga i le afioga i le peresetene o le mafutaga a tina le afioga i le faletua ia Peseta Punipuao Sala Fata ma lona laulau e tatau ona sau se malaga tafafao a tina o le matagaluega Sagato Mikaele i Niu Sila se’i tau fesuisuiai ai lagona ma le fiafia o nai tina ma se’i sui ai foi se isi siosiomaga fou mo latou nai lo le nonofo pea i totonu o le nuu ma aiga.

O le tāua o le malaga ona o loo iai nai tina o le latou taimi muamua lea ua malaga mai ai i nei atunuu ma ose fiafiaga sili lea mo le mafutaga atoa a tina tagata o Mikaele Leauvaa.

E fa vaiaso na tapenapena ai le malaga ma na saili lava i lima tupe e totogi ai pasese ma vaega uma na faatino ai le malaga e ala lea ia latou Bingo sa fai faatasi ai ma le fesoasoani na tuuina atu e le matagaluega lea ua mafai ona faatinoina mai ai le malaga i Niu Sila nei.

Na taunuu mai le malaga ona alu lea o le tina latou i lona aiga e faamautu ai, ae sa lē tuua ai le agaga naunau o alo ma tamafanau o le afioaga o Leauvaa o loo i le mafutaga i Aukilani nei i le latou pulunaunau lea i le fia maua o se latou avanoa e feiloai ai ma o latou aiga o loo malaga mai i le mafutaga.

Ma o lea sa latou tapenaina ai loa se ‘ava o le feiloaiga e aloaia ai le taunuu manuia mai o le malaga a le mafutaga a tina o le matagaluega o Sagato Mikaele. 

O le auga o aute o le faigamalaga o le malaga tafafao mai, ae lē o se sailiga tupe, ae sa tapenaina lava aitema a tina e faafiafia ai i totonu o Aukilani mo latou aiga aemaise o uo ma ē masani o loo faatali atu i Aotearoa. Peitai ane e tautala galuega lelei a le tagata.

O faafiafiaga eseese a le mafutaga a tina sa faia i Malaeola i le faaiuga o le vaiaso ua mavae, o iina na vaaia ai le lotonuu ma le loto aiga o tamafanau o le afioaga o Leauvaa o loo i Aukilani i le latou lagolago malosi lea i le faamoemoe a tina e pei ona iai i lea afiafi. Aemaise ai o le lagolago atu foi o afioga a Patele faapea uo ma ē masani i le tauaaoina atu lea o a latou meaalofa tupe e fai meaalofa ai i le mafutaga a tina. Ua sasaa le alofa e ala i sausaunoaga o le po mai afioga i Patele aemaise o aiga uo ma ē masani sa fai a latou siva Samoa e tauala atu lea i o latou aiga sa malaga mai i le faigamalaga.

O le maualuga o faafiafiaga a le mafutaga a tina i lea afiafi ona sa auai mai ai le afioga i le Minisita ia Hon Sala Fata Pinati ma lona faletua e lagolago i le faamoemoe. O le tofa ia Tevaga Vailua Lio sa fai ma fofoga o le po o ia foi o le taitai malaga o le faigamalaga. E silia i le $60,000 le tupe sa taulimaina e le mafutaga tina a Sagato Mikaele i lea po ma e faafetaia ai e le aumalaga mai Samoa le mamalu o le atunuu o loo aumau i Aukilani nei ona o le lagolago atu ia latou faamoemoe.

O le latou faafetai sili mo le mafutaga a Leauvaa i Aukilani i le latou galuega fita sa feagai ai o le faatinoina lea o mea uma sa faatino ai le faamoemoe o tina aemaise ai o le tausiaina o le malaga. O le taeao o le Aso Toonai na faia ai loa le aiavā a le aumalaga mai Samoa ma aiga o le mafutaga i Aukilani e tali faafetai ai i mea uma sa latou saunia a’o iai i Aukilani. O le aso 30 o Novema ua iai le faamoemoe o le aumalaga mai Samoa e toe taliu uma ai le mafutaga i Samoa auā le Kerisimasi ma le Tausaga Fou.

Peresetene o le mafutaga – Afioga ia Peseta Punipuao Sala Fata

Sui Peresetene – Susitina Lauano Lene

Failautusi – Tiuana Mailo

Teutupe – Sofia