E lata i le 4000 le aofai o i latou na maimoa ma molimauina le uluai taimi ua vaaia ai le alii o Sonny Bill Williams, a o taalo ai i le Aso Toonai na tea nei i se tasi o Kalapu i le aai o Kalaiesetete.
Sa iai i lea tumutumu o tagata ma le Faiaoga o le laina i tua a le All Blacks ia Wayne Smith.
O le malae taalo o Sheldon Park lea na faia ai le taaloga lea i le va o le Lincoln University ma Belfast, lea na taalo ai le alii lauiloa o SBW, ma ua amata ai lana miti o loo tulituli pea, e fia ofu i le Ofu Uliuli i le Taamilosaga o le Ipu o le Lalolagi i le tausaga fou.
E na o le 49 minute na taalo ai le alii i le taaloga, ae na matuā faamalieina le toatele o le aumaimoa i le faatinoga a le alii ma manumalo ai lana au o Belfast i ‘ai e 22 – 7, e aofia ai ma le sikoa mataina a Sonny lea na momo‘e ai ma le polo pe tusa ma le 40 mita le mamao ma laasia ai le laina sikoa.
Ua matuā faailoa le fiafia tele o le alii i le amataga o lona olaga taalo i laufanua o Aotearoa nei i le Lakapi Iuni, ma ua ia faailoa foi lona faagaeetia i le toatele o le atunuu na autovaa atu e maimoaina le taaloga.
Fai mai le alii e sili atu faalogona o le olioli ma le faagaeetia nai lo le Lakapi Liki sa taalo ai i tausaga e tele, ma e oo lava foi i tamaiti laiti na ia faalogoina a latou tauvalaau atu, “Oh Sonny Bill, you are cool”.
Fai mai le alii, ua lava lea ma totoe na te lagonaina ai le alolofa o tagata maimoa ia te ia.
Na faailoa foi e le alii lona faafetai i le Kalapu a Belfast mo le avanoa ua maua e amata ai lona faamoemoe, ma e lē toe taueseina foi o ia ma le Kalapu, aemaise o le a avea ma auala e faatosina ai pea nisi talavou lakapi i lea Kalapu i Kalaiesetete.
O le tulaga o le Second Five na taalo ai le alii o Sonny, na faamauina e faa 21 na maua le avanoa e tamoe ai ma le polo, faa 13 ona mafai ona ia pasiina le polo a o pu‘e e le isi au (offloads), faatasi ai ma le lelei o lana puipui ma sao lelei lana pasi, ma ua lava lea ma totoe e ono faasolo atu ai ina maua sona avanoa i le au faaitumalo a Canterbury i le Taamilosaga a le ITM o loo faagasolo nei.
Sa faapea foi ona auai le alii i le tapuaiina o le All Blacks i le taaloga ma Ausetalia, lea na ia saunoa ai ua fetaui lelei le tele o suiga o le tulafono ua iai nei o le taaloga, ma le ituaiga o taalo o loo iai le ‘au a Niu Sila. Fai mai Sonny e na te matamata ma lona lagona, e sau se taimi e avea ai o ia ma sui o le All Blacks.
A o le talafaasolopito lava ia o lona soifua taalo i Niu Sila nei, lea na faatumulia ai le itu i Matu o Kalaiesetete i le malae o Sheldon Park, o le uluai taimi o SBW i le togiga meamata samasama a Belfast.
