Alofagia e pisinisi Saina le nofoaga o tagata matutua i Mapuifagalele

 O sui o le aufaipisinisi a Saina i totonu o Samoa a’o momoli le latou faigameaalofa i le nofoaga o tagata matutua i Mapuifagalele
O sui o le aufaipisinisi a Saina i totonu o Samoa a’o momoli le latou faigameaalofa i le nofoaga o tagata matutua i Mapuifagalele

E faitau afe ma afe tala pe a faatupe le maau o pisinisi Saina i Samoa, na faaoo atu i tama ma tina matutua oi lalo o le tausiga a Tamaitai Taupousa i le aai i Mapuifagalele.

O le taeao o le Aso Toonai talu ai, na masii atu ai se vaega o faleoloa ma fale’aiga Saina, ae o tagata Saina taitoatasi, e avatu le latou fesoasoani. E tele lava i oloa e faaaogā i le maota ma taumafa manaomia. O oloa e aofia ai, pusa o ie mafanafana, palanikeke, pepa o faletaele, o ili faatu tu, o nofoa tulei, laulau faamoe, o pepa o faletaele, taga araisa, o pusa saimigi, ato fualaau faisua, ma le anoanoai o oloa eseese na la’u atu e le aufaipisinisi a Saina.

O le tulaga ese na molimauina ona e oo lava i tagata taitoatasi, o Saina o galulue volunteer i Samoa, na faaoo ane foi a latou mealofa, e pei o le tamaitai Saina, Sister Shu, o loo ave lana galuega faamisiona i le Ekalesia a Iesu Keriso o le Au Paia o Aso e Gata ai. Na avatu foi lana mealofa fesoasoani o taumafa ma oloa e faaaoga e tina ma tama matutua, pei o pusa pamper ma isi.

Na talanoa le alii pule Samoa o le kamupani a le alii Saina G.S.I, Susuga Joe, e faafetai i le avanoa o loo faaauau ai pea le latou auaunaga i tama ma tina matutua o Samoa, i Mapuifagalele. Ua silia i le fitu tausaga o latou faia pea lenei tautua ma le loto fiafia. Ae ua avea ai o se faataitaiga i isi foi faipisinisi Saina i le atunuu. E aofia ai le Coin Save male faleaiga o le DMC, ma isi.

Peitai o se tasi lenei o molimau ola o galuega o faia nei e le malo o Saina i le lalolagi atoa. Sa faapea manatu o se vaega toatele o le tatou atunuu, e na’o Samoa lea e faapito mai iai le alofa o Saina, ona atonu e iai se isi mailei o mulimuli mai ai i tua. E iai foi talitonuga i se vaega o tatou tagata faapea, o le tagata Saina, e siu, ma limau’u. E lē manao e ave fua sana mea i se tagata.

Ae i faamaumauga ma le tele o molimau ua maua nei, ua iloa ai e leai ma se faamaoniga o na tuua’iga lē faavaea sa faia e se vaega o tatou tagata faasaga i tagata o Saina ma taitaiseseina ai lava lagona o tagata faasaga i tagata Saina.

Ina ua lē gata ua amata ai nei ona foai pisinisi Saina i totonu o Samoa i tagata o Samoa, ae o loo faaauau lava ona ‘ae’ae le atunuu atoa, e ala i atinae o loo faia o fesoasoani mai ai le malo o Saina. Ua faamauina foi le iai o molimau maumaututu, e le na’o Samoa o loo sasaa mai iai le alofa o le malo o Saina, aemaise lava i tulaga tau a’oa’oga.

O le talitonuga o lea malo ma le mafuaaga o le faaauau ai ona naunau e fesoasoani i tulaga tau a’oa’oga, ona e faapea Saina, a popoto fanau a se atunuu, o le a faigofie mea uma ma taugofie le faagaioiga o mea uma, auā ua popoto uma tagata o loo faatautaia se faigamalo, ma ona tagatanuu.

I faamaumauga o lenei vaitaimi i le va nonofo ai o Saina ma atunuu tau atinae o le laloagi, e aofia ai ma Samoa, ua silia i le 10 tausaga, o avatu fua e Saina aumalaga mai ofisa faasalalau, e silia i le 200 i le masina, i totonu o le tausaga atoa.  O le auga o na aumalaga toatele, a tagata tusitala, o tagata pueata, inisinia, o tagata o le pulega. Ina ia o latou maua avanoa, e vaaitino ai ia Saina, ma foliga o Saina, ma latou meafai, o le faagaioiga o le atunuu, o le tamaoaiga, ma le faatumauina.

Ma mulimuli ane, ia mafai ona toe foi atu tagata faasalalau nei i o latou atunuu, ma ta’u atu, lipoti pe faasalalau atu o latou lagona ia Saina (China in the eyes of the media representatives).

O iina tonu lava lea na maua ai se lagona o le Tusitala, e lē moni faaupuga na ola ane lava o faalogo iai, e faapea o tagata Saina e lima u’u, ma lē mananao e ave fua ni a latou mea i ni tagata. Pau faamaumauga maumaututu ua molimauina nei, o tagata o lenei atunuu o Saina, e ova le galulue malolosi, e matuā faigaluega lava seia malie le loto i le tulaga ma foliga vaaia ua taoto mai ai se galuega o faatino faatoa mānava.

Ua faamauina foi i molimau, le limamau o tagata Saina, ona e oo lava i le malo milionea o Amerika, e lē o faaalia iai se limau’u o Saina, e ala i nonoga tupe faalevaomalo o loo avanoa ia Amerika, faapei lava ona faia i le tele o atunuu i le atu Aferika, Aferika i Saute, le atu Asia, Keripiane ma le Pasefika.

Ae i le foai matagofie a le aufaipisinisi Saina i Samoa mo le aai o tamā ma tina matutua i Mapuifagalele i Vailele, na latou ta’utino, o le a lē gata ai i’i. Ma na faaiu i le faafiafiaga a le ausiva mai le faleoloa a le G.S.I. ma feofoofoaiga o alofaaga ma faafetai molia i le Atua i lea taeao.