Alofa i e matitiva ma fafaga i e o loo fia aai

Taumafataga na foai fuaina mo le atunuu
Taumafataga na foai fuaina mo le atunuu

O le faamoemoe maualuga o susuga i faafeagaiga ma o latou faletua ma ekalesia taitasi o le Samoan Assembly of God i Niu Sila, o le faatino o le galuega o loo aoaoina mai i le afioga Paia a le Atua.

O le alolofa atu lea i e o loo matitiva, e ala i le foai fua atu o lavalava ma fafaga i e o loo fia aai ma fia feinu. O mea ia ua faasino mai e le Agaga Paia o le Atua e tatau ona fai, aua o le toatele o tagata o loo latou laugaina ma aoao le upu a le Atua ae le o mafai ona faatinoina le feau ma le savali o loo finagalo le Atua e tatau ona fai mo ona tagata o loo fia maua se fesoasoani.

O le galuega ma le gaioiga ua fai nei e le Samoan Assembly of God i Niu Sila ua faaautu lea mo tagata ua matua manaomia lava le fesoaosani e ala i mea ua ta’ua i luga.

O le taeao o le Aso Toonai na tumutumu ai le hall a le ekalesia o le Assembly of God i Magele i le mamalu o le atunuu na latou fia maua lea fesoasoani, ua latou la’u tagapepa lavalava o tagapepa meaai aemaise ai o nisi o tagata ma fanau ua ‘oti fua ai o latou ulu i totonu o le fale.

O tagata Samoa aemaise o tagata mai isi atunuu ua lolofi atu e tufi taufao lea manuia ua faasafua mai e tagata o le Atua mo tatou. Ua le gata i manaoga o le tino, ae ua oo foi i manaoga o le agaga lea e toatele nisi o i latou sa fia maua lea fesoasoani, e ala i mea o loo tutupu io latou olaga, aemaise foi o gasegase o loo maua ai, ma sa galulue ai lava le aufaigaluega ma sui o le ekalesia e faatalatalanoa o latou manaoga ma fai iai le tatalo.

Susuga i faafeagaiga ma ekalesia Samoan Assembly of God i Aukilani

Ua galulue faatasi susuga i faafeagaiga ma o latou faletua faapea sui o aulotu taitasi e faatino le misiona a le Atua e pei ona aoaoina i totonu o falesa taitasi.

O lagona o nisi o le atunuu sa faaaogaina lea avanoa e ave ai lavalava ma meaai, ua latou lagona le agaga fiafia ma le loto faafetai i le Atua i lenei ekalesia ma le galuega fesoasoani mo i latou, aua e moni lava e maua tupe, ae le a’ua’u ai le faasoa i le totogiina o pili ma le faaaogaina o fanau, aemaise o tupe e valaau mai ai aiga i Samoa. Ae pei la ua maua lea fesoasoani mo aiga e tau sefe mai ai le tupe i le faatauina o lavalava ma le faatauina o meaai i lea aso.

E molimau le isi aiga e le o mananao e faailoa o laua suafa o le tausaga ua mavae sa maua atu ai a latou meafale i lenei lava polokalame, o nofoa o le latou fale, ma o ni meafale fou ma lelei, ua lagona ai lava le fiafia i le faamama avega o lenei ekalesia i le atinaeina o latou aiga.

O le galuega faasoo a Keriso o lea ua taulamua ai Samaria agalelei i susuga i faafeagaiga ma o latou faletua o le ekalesia Assembly of God i Niu Sila, faapea a latou aulotu, ua foai ma le loto malie lavalava faapea foi meaai faatasi ai ma fanau ua iai le tomai i le faafugaina o ulu o tamalii, ua auauna faatasi e faatino le finagalo o le Atua.

E iai nisi aiga ua le popole i mea e pito sili ona taua i totonu o latou aiga, ae ua foai fua mai ona o le faalogo ma usitai i le mea ua tuuina e le Atua i totonu i o latou loto. Aua e sili le manuia o le foai nai lo le na te talia. O loo iai foi nisi o le ekalesia o loo faaauau i le misiona a le Atua i nisi o atunuu i fafo atu o Niu Sila e pei ona malaga atu ai nisi o susuga i faafeagaiga ma o latou faletua faapea nisi o sui o ekalesia.

O le polokalame lenei na amata mai i le tausaga ua mavae, i meafale lea sa foai fua foi i tagata faapea ma taumafataga ma vaiinu. O le tausaga lenei ua silasila ai le komiti ma le vasega o faifeau e sui ni mea e galulue fesoasoani ai mo le komiuniti, ma o lea ua latou foai fuaina ai loa lavalava ma meaai ma vaiinu.

O se faamoemoe ua vaaia ai e le ekalesia le toatele o le mamalu o le atunuu o loo fia maua se fesoasoani, ma ua iai foi la ma le lagona i susuga i faafeagaiga ma le ekalesia aoao i Niu Sila e faaauau pea i tausaga taitasi lea misiona mo tagata lautele.

O le masina fou o Iulai ma Aokuso lea ua fuafua ai le isi polokalame faapenei i Ueligitone ma isi vaega o Niu Sila, aua o lenei faamoemoe o loo aofia uma ai lava le matagaluega atoa i Niu Sila nei.