O le faaiuga o le vaiaso na faagata ai suafa o i latou e fia faaofi atu i faigapalota laiti o loo loma nei i itumalo e tolu ua faamave o latou faipule.
E pei lava ona auina atu i lipoti a le Samoa Times i vaiaso ua tuanai, o i latou e toatolu ua iai nei le manaoga e toe tamomo‘e mai mo le isi faiga filifiliga e ala i palota laiti, ua aofia ai le Afioga Lealailepule Rimoni Aiafi mo le Itumalo Faleata i Sisifo, le Afioga Palusalue Faapo II mo le Itumalo o Safata, ma le Afioga Vaai Papu Vaelupe Vaai mo le Itumalo o Vaisigano Numera 1.
O i latou nei ua malilie lava e toe tauva i le sailiga filifiliga lea ua alo atu nei i ai ae ia agai mai i le Palemene o sui o le Vaega Faaupufai o le Tautua Samoa. O le faaiuga la o le vaiaso na tuanai atu na aloaia ai loa le ofi mai o nei sui o le a fai ma sui o le Tautua Samoa i palota laiti nei.
Faaalia e le Peresitene o le vaega faaupufai le Tofā Panoa Tavita Moala, o le autū lava o le taumafaiga a le Tautua Samoa ina ia iai se isi leo e mafai ona tali atu i le Malo ma ia mafai ona faatoilalo le Malo e ala i palota tele a le atunuu i le tausaga fou.
O lona finagalo, ua tatau ona iai se isi vaega faaupufai malosi e mafai ona tulai mai i le foe o le atunuu ma ua oo i le taimi e sui ai le faigamalo o loo iai nei e pei ona tulai mai ai le Vaega Faaupufai e Puipuia Aia Tatau a Tagata le HRPP.
O se sauniga na faatautaia ma auai atu ai sui o le Tautua Samoa na folasia ai finagalo nei o ta‘ita‘i o le Tautua Samoa ma o le finagalo foi lea o sui tauva mo le tofi faipule ua tulai mai nei, o sui o lenei vaega faaupufai mo lea faamoemoe.
O le finagalo o ia sui ua moomia e Samoa se isi taitaiga ma ua sauni le Tautua Samoa ina ia o latou faatino manaoga eseese o le atunuu aemaise i le itu lea ua faalogoina ai le mafatia o le atunuu i le tamaoaiga, ua iai nei ma le siisii pea i luga aemaise mataupu o loo lagalaga pea e le atunuu, ae manatu le Tautua Samoa ua lē o tali mai i ai le Malo.
Mo Faleata i Sisifo e toalua sui o le HRPP ia ua faaulufale atu suafa e tauva faatasi ma Lealailepule Rimoni Aiafi. E toalua foi sui o le HRPP o le a tauva ma le Afioga Palusalue Faapo II mo le isi nofoa o Safata, ae o le Afioga Vaai Papu Vaelupe Vaai, o lea na aloaia foi i le faaiuga o le vaiaso le tasi o le itumalo e toe ave le tofi faipule ia Vaai e aunoa ma se sui e tauva faatasi i le faigapalota.
O le Afioga la Vaai Papu lea ua mautinoa o le sui lea o le Tautua Samoa ua faamautu le tumau i le nofoa o lona itumalo.
