Ua faamaonia e le faamasinoga le nofo a Mulitalo Lavea Lisona i le suafa Tagaloamatua o Solaua ma Manunu e pei ona mae‘a ona faia ai lana saofai i Solaua i le aso 14 Setema 2013 ma ua poloaina le Resitara ina ia lesitalaina i le Tusi Lesitala o Matai”
Ua sauni le afioga Tagaloamatua Lavea Lisona e faafeiloai lo latou nuu o Solaua i lona faamoemoe e toe faia le faiganuu sa iai i tausaga e tele ua mavae, ma ia toe faamaopoopo ona aiga aemaise o le lautele o le afioaga.
“O le faanaunautaiga ia tausi le nonofo filemu ma le fetausiai o tagata ma atinae le nuu ina ia maua le ola fiafia o aiga uma”. O le finagalo lea o le afioga Tagaloamatua ina ua ia faafeiloai le tusitala i le Aso Toonai i le mae‘a ona lau le faaiuga a le Faamasinoga o Fanua ma Suafa i Mulinuu i le Aso Faraile 29 o Me 2015.
O le faamasinoga lea sa suesueina ai le pule ma suli faavae moni o le suafa Tagaloamatua i Solaua ma Manunu ma Lalomauga. Na saunoa mai Tagaloamatua o le faatoa toe nofoia lea o le suafa o lo latou aiga i le tuanai o ni tausaga se tele sa avanoa ai.
O le faamaonia e le faamasinoga o lana nofo na faia i le suafa sa faaalia ai foi le agaga faafetai o se tasi o suli o le suafa sa la tutu faatasi, le afioga Pa‘u Tafaogalupe Mulitalo sa faaulu foi lana talosaga. Na saunoa mai Pa‘u o se tulaga faafiafiaina o ia ona o se matatia lea i lona olaga finau i measina a lo latou aiga, aemaise e lē gata o le suafa a o eleele e faasino i le suafa Tagaloamatua.
Sa aofia i le faaiga suega lenei poo le faamasinoga le itu na tetee a Alii ma Faipule o Saoluafata, ma sa latou finauina i le latou talosaga le soloia o le nuu o Solaua. Peitai o le faaiuga a le faamasinoga o loo teena ai lea finauga, ma ua faapea mai foi se finagalo o le faamasinoga e lē o le mataupu lea o loo suesueina ona o loo agai le faiga suega i le sailia o suli faavae o le suafa Tagaloamatua o Solaua ma Manunu.
O le faaiuga a le faamasinoga e pei ona tuuina mai se kopi o loo faaalia ai e iva itu na lotolotoi i le faamasinoga. E lima itu na talosaga e aofia ai le itu a le afioga Tagaloamatua Lavea Lisona ma Pa‘u Tafaogalupe Mulitalo, ae fā itu na tetee.
O se vaega o lenei faaiuga e faapea:
“Ua faamaonia e le faamasinoga o le suli faavae o le suafa Tagaloamatua i Solaua ma Manunu ua iai lea ia Tagaloamatua Tootuga, e suli mai ai Tagaloamatua Luafala ma lona tuafafine o Mautoga Tagaloamatua Tootuga, o suli moni ia o le suafa Tagaloamatua i Solaua ma Manunu”.
“Ua faamaonia e le faamasinoga o le pule e filifilia ma tofia ai se nofo poo ni nofo i le suafa Tagaloamatua i Solaua ma Manunu ua iai lea i suli o Mautoga Tagaloamatua Tootuga, e suli ai le itu tagi 1, 2 ma le itu tagi 5 o le faamasinoga lenei, e aofia ai ma suli o Tagaloamatua Luafala e lē ni suli o Tagaloamatua Leatuvai, faatasi ma suli o Tagaloamatua Maotai o le tamafai.”
“Ua faamaonia e le faamasinoga e lē toe feaiāa‘i filifiliga o le suafa Tagaloamatua i Solaua ma Manunu ma le suafa Tagaloamatua o Lalomauga”. “Ua faamaonia e le faamasinoga le nofo a Mulitalo Lavea Lisona i le suafa Tagaloamatua o Solaua ma Manunu e pei ona mae‘a ona faia ai lana saofai i Solaua i le aso 14.09.2013 ma ua poloaina le Resitara ina ia lesitalaina i le Tusi Lesitala o Matai”.
“Ua teena e le faamasinoga le pule faasa‘o a le suafa Ilimatogafau ma le suafa Leafa i le suafa Tagaloamatua o Manunu ma Solaua”.
“O le faasalalauga i le Savali o le aso 28.4.2014 mo le tau faanofoina o Mesepa Seiuli ma Herman Arp i le suafa Tagaloamatua o Solaua ma Manunu ua soloia”.
“O le faasalalauga i le Savali o le aso 28.10.2014 e uiga i le tau faanofoina o Leifi Lipine ma Tofinuu Samuelu i le suafa Tagaloamatua o Solaua ma Manunu ua soloia, ma ua faaleaogaina le faaiuga LC11951/P6, P8, P10, P13 ona ua sese”.
“Ua talia talosaga LC11951, P1, P2, P3, P4, P5 ma le P9 ae teena talosaga LC 11951/P6, P8, P10, P12”.
