Aloaia le ofisa fou ma le pulega fou – Gano Excel

Ua tatalaina nei le ofisa fou o le kofe a le Gano Excel i Aukilani i Sisifo, i lalo o le pulega fou ma se taitaiga fou mo Niu Sila atoa, faapea foi ma Samoa.

O le susuga ia Afoa Taofiga Tuuga Stevenson, ma le faletua ia Violet Tuuga Stevenson, ua tofia ma filifilia mo le puleaina o lea ofisa fou e pei ona faatuina i Te Atatu Penisula.

E lē toe tau faailoaina le aogā ma le sao o le kofe a le Gano i le soifua maloloina, aemaise ai o gasegase tumau, ma isi lava ma‘i eseese o le tino.

E lē gata i le kofe, a o le tele ma le anoanoai o isi mau oloa ua mae‘a ona gaosia faapitoa e fesoasoani, ma avea foi o ni fofo mo gasegase, poo le tausia lava foi o le soifua maloloina ma le ola manuia.

E pei ona silafia sa tautuaina le mamalu o le atunuu e le susuga ia Pati Tafa ma le faletua ia Faye, ma sa faagaioi lona ofisa autū i Magele i Aukilani i Saute.

O suiga ma gasologa o le soifuaga, i moemitiga ma galuega ua mafua ai suiga e pei ona iai nei le kamupani, ma lona ofisa autū fou i Te Atatu.

O le susuga ia Afoa Taofiga ma le faletua ia Violet, sa galulue muamua ma avea ma nofoaga autū mo le Gano lava i Ueligitone e pei ona faafofoga i ai i faasalaluga faapisinisi i luga o le Radio Samoa. Peitai o le agai mai i Aukilani ona o le faamoemoe lava o le kamupani, ma suiga e pei ona ta‘ua muamua.

O le afiafi o le Aso Toonai na tea nei, aso 30 o Aperila, sa aloaia ai le tatalaina o le ofisa autū fou, ma le pulega fou a le Gano Excel i Aukilani, ma le faamoemoe e vaaia atoa ai ma Niu Sila atoa ma Samoa. Sa maitauina le toatele o uo ma paaga, aiga ma aumea mamae a le kamupani ma le pulega fou, sa faatasi ane ma auai i se sauniga faapitoa sa faamanuia ai, le ofisa ma galuega a le pulega fou ma le kamupani.
Saunoa le tofa ia Afoa Tuuga Stevenson i se feiloaga ma le Samoa Times e faapea, o loo faatumauina pea vaega uma o le auaunaga ma le tautua a le kamupani. Na pau le tulaga ua suia, o le pulega ua faafoeina ma vaaia le ofisa ma ona lala e pei ona sa iai muamua.

O le tele lava foi o i latou sa auauna mo le faalauiloaina o oloa a le kamupani, o loo tumau ma faaauau pea, seia oo mai lava i le taimi nei.
Sa ia faaaogāina foi lea avanoa e faaoo ai se faamaulaloga a le kamupani a le Gano i le toatele o ana uo ma paaga faapisinisi, ona o le motusia faafuasei o fesootaiga mo sina vaitaimi.

E pei ona ta‘ua o suiga ma le toe faatulagaina o fuafuaga sa mafua ai lea faaletonu. Peitai o mea uma ua toe foi i le tulaga masani e pei ona amata mai ai, ma tautuaina le mamalu o Samoa ma le Pasefika.

O le ofisa fou e pei ona tatalaina nei, o loo i le 548 Te Atatu Rd i Te Atatu Penisula. Sa faamaonia mai foi e le susuga i le alii pule ma lona faletua e faapea, o loo mafai lava ona maua pea fesootaiga ma Samoa ma nisi o vaega mamao, ae ao ina fesootai ane pea i le ofisa autū i telefoni 09 828 2084, poo le 09 834 7151, aemaise ai o le tuatusi i upega o fesootaiga, ganoxl@gmail.com.

O ona itula masani e tatala ma auauna ai, Aso Gafua i le Aso Lulu o le 9am – 5pm. Aso Tofi ma le Aso Faraile o le 9am – 8pm, ma le Aso Toonai o le 10am – 2pm.

O auaunaga masani o loo faatumauina ma faataunuuina pea mo Aukilani ma Niu Sila atoa ma Samoa.