Na fai lava si pisi o le alii Palemia o Samoa, le afioga Tuilaepa Lupesoliai Aiono Sailele Malielegaoi i le faaiuga o le vaiaso na tea nei, a o iai i Aukilani i le faato‘ā taliu mai ai foi i Ausetalia i le tele o fonotaga ma feiloaiga faalemalo. E ui i lea, sa maua pea lava lona avanoa e auai ma faatino ona tiute ma galuega e pei ona valaauina ai i matata eseese e ese mai i tiute faalepalemene.
Na tumutumu nisi o le mamalu o le atunuu i le maota Samoa i Niutone i le taulaga tele o Aukilani, i se feiloaiga ma le alii Palemia, o le taitaifono foi lea o le Iuni lakapi a le atunuu.
O le tatalaina aloaia ma le faalauiloaina o le komiti ma le faalapotopotoga ua faavaeina mo tapenaga uma, e lagolagoina ai le Manu Samoa i lona taunuu mai, atoa ai ma taimi uma o le a iai i Niu Sila mo taaloga o le Ipu o le lalolagi i le masina o Setema 2011.
O le afioga i le Palemia, na saunoa i le saunoaga autū, ma toe faamanino le tāua o le iai o le komiti e pei ona faavaeina. I le saunoaga lava a le alii Palemia, sa ia ta‘ua ai foi e leai se isi faalapotopotoga aloaia ua tuu i ai le talitonuga ma tofia e le Iuni lakapi a le atunuu, e nafa ma lea faamoemoe, ua na o le komiti lava ma ona sui e pei ona tatala aloaiaina.
O polokalame uma, e oo lava i sailiga seleni i Niu Sila lava ia e fesoasoani ai mo le ‘au, o le a nafa ma lea tino fou ua fofoaina. E ui i lea, ae na ia ta‘ua e lē faapea o le a taofia ai nisi o faiga ma faatinoga ua tapenaina e nisi, auā o le latou aiā tatau lava lea. Peitai o le komiti ua faatuina, ua tuu i ai le faatuatuaga o le Iuni a Samoa, ma o le finagalo foi lea o le tapuaiga mamalu a le atunuu o loo talimau mai i le atunuu.
O le afioga ia Toalepai Lui Tautolo ua tofia e avea ma taitaifono o lea komiti. O nisi o sui e aofia ai le afioga ia Aiolupotea John Roache, o le susuga ia Faausuusu Mika, Tagaseuseu Ilaoa ma isi e toatele. O le mae‘a ai o le saunoaga a le alii Palemia, ona saunoa ai lea ma le taitaifono le afioga Toalepai Lui Tautolo, e toe fofogaina le auga ma le alafua ua mae‘a ona faataoto i le taimi nei mo galuega faagasolo a le komiti.
Saunoa Toalepai, o le a maua se faalauteleina ma fofogaina le mamalu o le atunuu lautele e ala i le galuega a le au faasalalau i leitio, televise ma nusipepa ma soo se auala lava o fesootaiga o loo faaaogāina i lenei vaitau.
E toatele foi sui o nusipepa ma leitio faapea le polokalame a le televise tasi, Tagata Pasefika, sa auai ma ua faamoemoe le komiti, o le a fesoasoani tele lea mo le saga faalauiloaina atili o a latou fuafuaga.
O le susuga i le faafeagaiga o le ekalesia EFKS Sandringham, Rev Dr Liuoaana, sa tapenaina le sauniga puupuu na tatalaina ai lea faamoemoe. E toatele nisi o le mamalu o le atunuu ma le aufaipisinisi mai isi foi atunuu sa auai.
Sa auai foi le afioga i le faipule o le itumalo o Magele, le tofa Su‘a William Sio. O nisi o malo faaaloalogia sa iai, o le susuga i le alii Faufautua sinia o le pulega faaitumalo Aukilani, le Super City, Alf Filipaina, o le Konesula Aoao o le malo o Samoa i Niu Sila, Faolotoi Reupena Pogi ma isi.
O le susuga ia Tagaseuseu Ilaoa, o se tasi o sui o le komiti sa fai ma fofoga o le aso, faatasi ai ma le lagolago a le afioga i le taitaifono, le susuga Toalepai Lui Tautolo. O loo tatala pea le avanoa mo soo se tasi lava e fia lesitala e avea ma sui o lea faalapotopotoga, pe afai e totogi le $50, ae maua ai le pulou ma le mitiafu o le Manu Samoa.
O nisi o lesitala taugata e oo atu lava i le ta‘i $500, ma ua faapitoa lea mo le aufaipisinisi ma kamupani tetele, ma soo se tasi lava foi e gafatia. O le aoauli o le Aso Toonai, aso 18 o le faaiuga o le vaiaso na tea nei na faataunuuina ai lea faamoemoe.
