Ua alo atu nei le vasega faaiu a le Aoga Tusi Paia a le AGAPE i Ueligitone mo le taimi e selesele ai ma le fiafia galuega sa feagai ai i le tele o tausaga ua mavae.
O le Aso Toonai a sau nei, muamua o Tesema o le a faataunuuina ai le faauuga o i latou ua maua tusipasi ma faailoga i le maota o le Arena i Porirua i le itula e tasi i le aoauli.
Ua maua le sooatulau mai se tasi o uo e faapea e toasefululima le aufaauu o lenei tausaga. Ua na o i latou lava ua mae‘a ona totogi o latou pili mo le aoga o le a faauuina.
O le puleaoga le susuga i le Faafeagaiga ia Rev. Dr Peniamina Williams e ta‘ita‘ia lea faamoemoe, faatasi ai ma le lagolago a susuga i faiaoga.
O le a faamautu atu i le lomiga o lumanai suafa o i latou o le a faamanuiaina i lea faamoemoe, ae tatou talosia le alo atu o lea foi Aoga faale-Tusi Paia mo ana polokalame faaiu o le tausaga.
