Ua tatau ona vave foia le gasegase o le Iuni lakapi a le atunuu, ma le pulega o le Manu Samoa a o lei aliali tele nisi matagā
E lē o se mataupu e faifaiaga i ai sona faaiuga, ae ua tatau ona vave foia le faafitauli.
O le feagai ai o le Iuni lakapi a le atunuu ma tuuaiga ma le avega ua faatietie nei i ai e le alii kapeteni, ae ua lagolago malosi atu nei i ai nisi o tama taalo, ua le tatau ai ona nofoai ma tau suesue poo ai e sa’o, ae ua tatau ona togi le solo, ma fai loa iai se faaiuga talafeagai.
O le umi na taoto ma taatia, o le atili pepesi foi lea ma ua iloa ai e le lalolagi papala o le pulega a le Manu Samoa, ma le Iuni lakapi a le atunuu.
Ua mu tele le afi ina ua amata ona agai i ai le anoano o finagalo o tagata lautele i luga o upega o fesootaiga ma tusitusiga faalauaitele.
E oo lava ia i latou mai fafo, ua faailoa manatu lē fiafia ma le faanoanoa tele, e tusa ai ma lipoti ua tautino ma faailoa e le alii kapeteni o le Manu Samoa, Mahonri Schwalger.
O le tali mai a sui o le Iuni lakapi o loo faasaga i ai tuuaiga, ua aliali mai ai le faatupulaia pea o nisi foi faitioga faasaga i ai.
O le tusi a le kapeteni a le Manu Samoa, ua lagolagoina e nisi o tama o le ‘au. O le popolega ua tulai mai, ona e foliga mai e itiiti vaega na laga e le kapeteni, ae tele ma anoanoai isi gasu sa nonofo ma tama taaalo, lea la ua amata ona aliali mai ma mapuna ae.
O le mea moni e lē taumateina, o le ala mama ma le pogai tonu lava lea o le aveesea o le manumnalo, ma le faamoemoe maualuga sa taumafai i ai alo ma fanau a le atunuu sa tausinio.
O le vaiaso foi ua tuanai e oo mai lava i le taimi nei, o loo faasolo ai lava ona tali mai i latou o le pulega sa faasaga i ai tuuaiga a le alii kapeteni.
Lefau Harry Schuster
(Sui taitaifono Iuni lakapi a Samoa)
Na faailoa manino le finagalo o le susuga i le sui taitaifono o le Iuni lakapi a Samoa, le afioga Lefau e tali ai tuuaiga a Mahonri e faasaga ia te ia.
O loo ta’ua i le tusi sa tali ai Lefau ia Mahonri e faapea, o tupe sa ia faaaogāina e taumafa ai le ava malosi, o tupe lava a Lefau ia, na te lei faaaogāina tupe a le ‘au ma le Iuni.
E na o le faatasi foi ona auai ane ma ana uo i le togalauapiga a le ‘au, ae na mafua ona auai ane i ai, ona o se tasi na te iloa lelei nisi o le pulega a le Manu Samoa, ma sa fia feiloai i ai.
E lē o iai foi se talitonuga o le sui taitaifono e iai se afaina ma se aafiaga o le faiaina o le Manu Samoa ia Uelese ma Aferika, ona o uiga sa ia faaalia.
Saunoa Lefau e lē o afaina tele i lona manatu tuuaiga a Mahonri, auā e leai ni faamaoniga. Peitai e ao pea ina faia le mea amiotonu ma le sa’o, pe afai e mae’a se suesuega, ae faamaonia e iai ni aafiaga o le ‘au i lana taitaiga ma ana gaioiga sa faia.
Su’a Peter Schuster
(CEO Iuni lakapi Samoa)
E matuā lagolago malosi e Su’a galuega a le Manager, Tuala Mathew Vaea, faapea ma le Faiaogaulu, Fuimaono Titimaea Tafua. Fai mai Su’a, o lona talitonuga ua mae’a ona fai lana galuega sa tofia ai, ma sa galue malosi foi e faatino ona tiute.
O le taumafai e toso ane sponsors ma le tele o uo ma paaga ina ia feiloai ma tama o le ‘au, le Manu Samoa. O lona finagalo o le a faaauau pea ona faatino lana galuega, e lē gata i lea, ae o le tausia foi ma le galulue faatasi ma le Faiaoga ma le Taitaimalaga.
O ona tiute ia sa faatino a o iai i Niu Sila le ‘au, o nisi o taimi sa taumafa sina ipu uaina, ma o le tele lava o faaaloalo a nisi e aunoa ma se tupe sa faaalu ai. O lona la talitonuga e leai se moni o tuuaiga e pei ona faailoa e le alii kapeteni, faasaga i lona tagata ma le pulega o le ‘au.
Sa sailiili e le Samoa Times nisi o tama sa maua ma fesiligia, Pe lē o a latou tupe maua na mafua ai ona faaalia o latou lagona lē fiafia ma auai faatasi i le finagalo o le alii kapeteni, e pei ona lagaina le faafitauli.
Peitai o le tali mai a nisi, ma e lē o mananao foi e faailoa o latou igoa, sa ta’ua ai e faapea, e leai, e lē o tupe, ae o le naunau ma le agaga ootia i le tapuaiga a Samoa sa vaaia i Samoa ma Niu Sila.
O le mafuaaga tonu lea ua lagolago ai i le mau a Mahonri, ina ia faailoa pea mea sa tutupu ma vaai i ai, ma e talitonu e lē o se ita, ae o le alofa moni ma le manumanu i le ‘au ina ia puipui mai i nisi faafitauli faapea e toe tutupu mai i le lumanai, e lē gata ina faaleagaina ai le agai o tama taalo mo taaloga, ae ono lepetia ai le fiafia o tamafanau e toe foi mai e ofoina le tautua mo le atunuu o loo mitamita ai.
O le susuga ia Eliota Sapolu, o le isi foi sui lea o le Manu Samoa, sa fiafia e faailoa pea lona igoa ma sana faamatalaga e saga lagolago ai le manatu o le alii kapeteni. Sa ta’ua e Eliota e faapea, e na te faamaonia sa iai meatotino a le ‘au sa faatau ese e sui o le pulega a le Manu Samoa.
O ia faiga e lē manuia, ma e lē na o le pau lea o tuuaiga faasaga ia i latou e pei ona tuuaia. Sa ia faamaonia foi, sa toetoe lava ina faia se tetee ma se teva a tama o le ‘au, a o lei faia taaloga mulimuli sa lē manuia ai. Peitai sa toe malilie lava ina ia faaauau pea taaloga, ona o le alolofa moni i le atunuu ma lana tapuaiga.
O le aliali a’e o faiga piopio ma le soonafai e pei ona tuuaia ai nisi o le pulega a le Manu Samoa, ua lē na o tagatānuu o Samoa ua faaalia iai o latou manatu. O nisi o le aufaasalalau i televise ma leitio, faapea ma tusitala ua velo aso faatasi agai i le tulai mai o le faafitauli.
O le alii milionea o Niu Sila, sa avea muamua ma faauluuluga o le Manu Samoa i le tulaga tau pisinisi, le susuga ia Sir Michael Fay, o le isi lea sa faaalia foi sona finagalo i lea lava mataupu.
Sir Michael Fay
O le finagalo o lea foi tagata iloga a Niu Sila, sa ia fesoasoani malosi i le atina’eina o le lakapi a le Manu Samoa, i le tausaga e 1995 e oo mai i le 2004. Sa ia ta’ua lona lagolago malosi i le mau ma le mataupu sa lagaina e Mahonri. Fai mai a ia, ua tatau ia Samoa, ona sui se faiga ma toe faataoto se isi alafua i le pulega o le ‘au ma le Iuni lakapi pe afai e manao ina ia toe faafoi ma toe faaleleia atili le lakapi i le atunuu.
O le saunoaga a Fay, ua tatau ma onomea ona suia le pulega o loo iai nei, ma ia faataatia se isi faafanua fou e faagaioi ai le puleaina o le taaloga.
E malamalama lelei lea foi alii palagi i tiute ma galuega aemaise o le faatulagaina o le puleaina o le Iuni lakapi a Samoa. E faavae lona manatu ina ua mafai e Mahonri ona tautala ma faailoa le mataupu e pei ona faasalalauina. Fai a ia, e masani ai i faiga a Samoa, ona taofia lagona o tama taalo, aemaise lava o tama fou e agai atu i totonu o le mafutaga a le a’u.
E pei e faaaogā lava le faaaloalo ma le faalogo ma uistai o le tagata fou, ia i latou tuai ma pulega a le Iuni lakapi, ona lē gagana ai lava lea o soo se tama e fou i le ‘au.
O le faiga ma le tulaga lea, o loo agai tonu i ai le finagalo o Fay, ma ua ia mautinoa ai le tāua o le manatu o le alii kapeteni o le Manu Samoa. Saunoa Fay, o le matala o le fofoga o Mahonri ma tautino le mea moni sa tupu, o le alofa moni lea i le atunuu ma lana ‘au, auā le lumanai.
O le ala foi lea o lona tu i tua ma lagolago le kapeteni, ona o lona naunau lava, ina ia faatumauina pea le alualu i luma ma le lelei o le Iuni lakapi ma le taaloga i totonu o Samoa.
Sa ia faaalia foi e matuā tele lona lagolagoina pea o le Manu Samoa, lea sa teutupe agai i ai ma inivesi ai lana $5 miliona tala faatasi ai ma lana paaga faapisinisi, le susuga ia David Richwhite.
Papaliitele Peter Fatialofa
(Kapeteni o le Manu Samoa)
E tele lava itu sa oo i ai se finagalo o Papalii ina ua fesiligia i sona foi finagalo faaalia e tusa ai ma le mataupu ua tulai mai. Peitai e ui i lea, e lē mafai ona tuutuu i le loloto sona finagalo, ona talu ai e lē o mautinoa i le taimi nei le mea moni. Sa ia faailoa ua tatau ona vave faia se faiga ma fofo le faafitauli, leaga ua logologoa tala ma ua iloa e le lalolagi atoa le faafitauli.
Sa ia saunoa afai ua lē amiotonu le pulega ma i latou o loo tauaveina le galuega, o le faaiuga lava ia e lē tatau ona toe ‘alo, ae faia loa ma faamalolo, pe a faamaonia tuuaiga. Afai foi e sese tuuaiga, ae o le mea sili ua faailoa e le kapeteni tulaga moni ma vaaiga sa tutupu ma maitauina. E lē vavevave tele sona taofi, ae lelei pea ona tālia se isi feiloaiga lata mai a le Taitaifono, o le alii Palemia foi lea o le atunuu, le susuga ia Tuilaepa Lupesoliai Sailele Malielegaoi.
Na pau lava lona naunautaiga, o le lagolago malosi ma le alofa i le ‘au, ae o faafitauli o mea lava e tutupu ma e tatau ona faia i ai ni faaiuga vave ma le talafeagai, ina ia puipui ma taofi ai le mamalu ma le manuia o le ‘au ma le Iuni lakapi.
Aussie McLean
(Faiaoga lagolago)
E lagolagoina e McLean le mau a le alii kapeteni o Mahonri, i le tatau ona faia se suiga. Ae o lona finagalo e lei afaina le faatinoina o taaloga a le ‘au i luga o malae, ona o le faafitauli sa faailoa ma lagā e le kapeteni. Ae afai e faatupu manatu mo le Iuni ma le pulega a Samoa, o lona itu lelei lea mo le lumanai.
Na pau le tulaga sa ta’ua e McLean, sa lē fiafia ina ua faapea ane nisi ia te ia ua toilalo lana ‘au, le Manu Samoa. Peitai o lana tali i ai, e lei toilalo le Manu, ae sa matuā matautia le tulaga sa oo i ai lana taumafaiga, ma sa matuā silasila i ai ma le toto’a le lalolagi atoa i le matautia sa oo i ai. E moni sa faiaina ia Uelese ma Aferika, ae o le mea moni sa faitauina pea le manumalo o le Manu Samoa i ia taaloga. O lona naunautaiga ia faia se suiga mo le manuia ma le lelei o le lakapi ma le Iuni a Samoa.
E pei ona faamaonia mai i nisi o lipoti, ua toavalu tama taaalo o le Manu Samoa, ua latou lagolagoina le mau ma tuuaiga a le kapeteni o le Manu Samoa. O le ata manino lava lea, ua vavala mai ai le moni ma le sa’o o tuuaiga ma lafoga a Mahonri.
O loo tālia pea poo le ā le isi laasaga, atoa ai ma se faaiuga o le a faia mo tulaga tofi e pei ona naunau i ai le toatele ina ia suia mo le taimi nei.
