Aisea ua vave fai ai le palota o le 2011?

Ua tuu fesilisili le au matau laulu o le atunuu ma le au fiafia i mataupu o polokiki poo upufai o Malo, pe aisea ua lē tuuina ai le palota o le tausaga fou 2011 i le faaiuga o le masina o Mati, lea foi na faatino ai le palota tele mulimuli ia Mati o le tausaga e 2006, ae ua tuu mai i luma i le aso 4 o Mati 2011.

A fua atu i le aso ua faalauiloa mai e le taitai o le Malo lea sa ia fofogaina i le tauaofiaga a le Palemene o le Aso Gafua, 4 Oketopa 2010, ua vave aemaise e lei atoa lelei le lima tausaga o le paeaiga o iai nei.

Peitai o loo pule le Malo i le aso e valaau ai le palota e fuafua i le masina tonu na faia ai le faigapalota mulimuli, seia vagana ni mea e tutupu faafuasei ona toe vave valaau lea o se faiga filifiliga a le atunuu.

Faaalia e se tasi o faipule o le Palemene masalo ua iai nai popolega o le itu faaupufai o le Malo, fua ina tuutuu mai i luma le aso o le palota o le tausaga asau.

E lei maua se avanoa e fesiligia ai le taitai o le Malo i le alii Palemia ona sa pisi i se faamasinoga a lona aiga sa auai, ae ua faaalia e se isi faipule o le itu a le Malo, ua lelei foi lea ua vave ona ta‘u i le atunuu le aso o le latou faiga filifiliga e sauniuni lelei ai, ma mautinoa ai le aso tonu nai lo le fai mea faalogo i faamatalaga salatua e taitai sese ai.

O le masina lenei o Oketopa ua taga ai ona faia momoli ma o‘o o sui faipule i o latou itumalo, ma na pau foi lenei o le taimi e tatala ai lea vaega o tu ma agaifanua a Samoa ua masani ai sui faipule pe a oo ina mae‘a lo latou taimi i le nofoa o se itumalo.

O le taimi foi lenei e faaaogā ai le avanoa lea e sui fou o loo tapenapena i le faigapalota e fai ai ma o latou foi momoli. Peitai e talitonu le toatele, e lē o le agaga lea o le tulafono ona ua na o faipule.

O tausaga ua mavae sa molimauina le faia o momoli o faipule ma aofia ai foi ma momoli o sui faaolioli ma sa oo lava i le faamasinoga moliaga o ia momoli ma faamaonia ai, e lē o se momoli e tusa o le agaga na fausia ai le tulafono ae o se faatosina.

E lē o faatamala foi la sui fou o loo sauni e tauva i le palota i le mataitu lelei o isi sui fou e lē o ni faipule, pe fai ni o latou momoli i le masina lenei auā o le a avea ma molimau lelei o sana tagi i le faamasinoga o faatosina, pe a lē manuia.

Faaalia e se ofisa sinia o le Ofisa o le Komesina o Faigapalota, o loo manino lelei le tulafono i le faia o o‘o ma momoli, ma e leai se mea o le a faaluafesasi ai.