“Ua lē ogatasi le futia ma le umele”, atonu o se fuaitau faigofie lea e faamatala ai lagona o le susuga i le alii pule o le faleaiga, MightyCee Island Flavour i Kalaiesetete, Fereti Taiulu ma le faletua o Litia (Sapapalii & Satapuala) ina ua tapunia lenei auaunaga i le aso 7 o Fepuari, ae faato‘ā valu masina talu ona amatalia.
O lenei pisinisi sa uluai faaigoaina o le Pasifika Food i lalo o le puleaga a le kamupani Lincoln Meat, ae sa faafoeina lava le galueaina o le fofoga taumafa e le susuga Fereti Taiulu ma lona aiga, peitai i le amataga o le masina o Ianuari na faalauiloa ai e Fereti i luga o le polokalama leitio Samoa, ua suia nei le igoa ona o lea ua see ese alii papalagi o le Lincoln Meat ae ua pulea toatasi e ia ma lona auaiga le pisinisi. E tusa e tolu vaiaso na va ai le suiga o le igoa fou ae toe faalauiloa mai ua tapunia aloaia.
Peitai ina ua fesootai atu le tusitala mo se faamatalaga manino mai le alii pule, na ia saunoa mai ona o ni faaletonu i le kamupani Lincoln Meat, ua latou manaomia se tupe $15,000 mo le tau aofai o ogaumu faapea mea uma o loo faaaogāina mo le faavelaina o mea taumafa e totogi muamua atu.
Na ia oo atu i le Pacific Business Trust mo se fesoasoani nogatupe ma fesiligia ai loa ownership papers e fia manaomia, sa fesiligia loa Lincoln Meat mo ia pepa tāua, peitai o le tali ane ia Fereti e mumusu i latou e tuu ane, ma o se faaletonu muamua lea ua matuā lē talafeagai tele. E lei manuia taumafaiga o se nogatupe ma ua fautuaina loa e le ofisa Business Trust le susuga Fereti e taatia loa le pisinisi ona e lē o maua atu nei pepa tāua, ae pe na faapefea foi ona sainia nei feagaiga i le uluai taimi.
Na faaalia e Fereti ua fai sina tele o le tau $15 afe, ae o lana fua atu pe na o se $5 afe, o le isi itu ua lē toe iai foi lenei pisinisi faatau povifasi i totonu o Kalaiesetete, ma atili ai ona fefeu le mataupu. Ua faalauiloa mai e Fereti talu ai ua gasegase foi le tina o le aiga, uma foi ona faatalatalanoa i le fanau ma ua tasi ai le moe, o le a sili ai ona faamuta loa lenei pisinisi, ae toe alo i luma mo se isi laasaga fou.
O le taimi nei ua ia manatu se‘i faamuamua lona aiga ma aoga a le fanau. Na ia momoli mai foi lana faafetai i le atunuu mo le lagolagoina o le auaunaga, aemaise foi o le nusipepa o le Samoa Times lea sa faatauina ai, e ui lava i sona lagona ina ia faaauau pea ae peitai, ua lē ogatasi le futia ma le umele.
