O le fesili lea a le Tautua Samoa i lana fono ma tusitala e faatatau i le fale fogafale 15 lea ua fuafua le Malo ina ia fausia i le itu o le taulaga i Savalalo lea e iai nei le flea market – ma le fale faatali pasi atoa ai le maketi o i‘a.
O se nofoaga tele lenei sa amata faalauiloa mai e le Minisita o Tupe, Afioga Faumuina Liuga ina ua amata talanoaina lea fale tele i le tausaga na tea nei. O le faamoemoe i lea taimi, o se fale lenei o le a tuu uma ai ofisa ma atinae mai fafo ua logo ane le Malo e fia faatū ni o latou ofisa i Samoa nei.
O lea la ua foliga mai ua iai ma isi ofisa faaopoopo mo faipule atoa ai sui o le Malo. O le faamatalaga a le Taitai o le Itu Agai, e fai atu le taugata o le soifuaga ma le tau leai o se tupe a le atunuu ae o lea ua sauni le alii Minisita e malaga i Saina e faamautu se aitalafu auā lea fale tele.
“Ua lē lava nei mau fale ua iai, ae tuu le aitalafu o le Malo e fau ai nei atinae? O ā tatou fanau ma fanau a a tatou fanau ia o le a matuā tigaina e totogi aitalafu nei i le lumanai,” o se saunoaga lea a Palusalue Faapo II. “E lagona ai lava le matuā faanoanoa tele o lenei vaega i fuafuaga nei a le Malo”.
Na lotea ai ma le fesuia‘i solo o le ofisa o le Minisita o Tupe, lea na ta‘ua e le Tautua Samoa, a uma le ofisa lea sa iai i le Ofisa tuai o Niu Sila i Apia, ae o lea ua see atu i le ofisa fou lea e ta‘ua e $600,000 (tala Samoa) le tupe na faaalu ai i le toe faaleleia, ae o le ave i se isi ofisa mai i fafo, o le ofisa masani o Minisita o Tupe i le fogafalealuga o le Faletupe Tutotonu i Apia.
O le tali a le Palemia ma le Minisita o Tupe i le fale fogafale 15, o fuafuaga alualu mamao nei a le Malo o Samoa, o loo moomia ai fale tetele faapenei. Ua tuua‘ia ai le Tautua Samoa i le leai o se tofā e talia ai atinae ia a le Malo.
O le tali a le alii Minisita i le fesua‘i o lona ofisa na ia faaalia ai, ua leva ona see isi minisita i fale ia ua mae‘a ona fausia mo o latou ofisa, ae na faatalitali lava i le ofisa tuai o le malo o Niu Sila seia iai se avanoa mo sona ofisa fou, lea la ua maua le ofisa fou i le NPF Plaza poo le maota tele o le NPF i Savalalo o lea la ua maua ai lona ofisa.
O le faamatalaga a le alii Minisita o le ofisa lea e lē na o ia e ana, o le ofisa o le
atunuu atoa.